តម្លៃប្រេងកើនឡើង ខណៈអាមេរិក និងអ៊ីរ៉ង់បន្តការវាយប្រហារថ្មីៗ ស្របពេលលោក ត្រាំ ថាការចរចានៅតែបន្ត
តម្លៃប្រេងកើនឡើង ខណៈអាមេរិក និងអ៊ីរ៉ង់បន្តការវាយប្រហារថ្មីៗ ស្របពេលលោក ត្រាំ ថាការចរចានៅតែបន្ត
តម្លៃប្រេងបានកើនឡើងកាលពីថ្ងៃពុធ ខណៈវិនិយោគិនកំពុងថ្លឹងថ្លែងពីភាពមិនច្បាស់លាស់ជុំវិញកិច្ចពិភាក្សារវាងសហរដ្ឋអាមេរិក និងអ៊ីរ៉ង់ ស្របពេលដែលប្រទេសទាំងពីរបានបន្តការវាយប្រហារថ្មីៗកាលពីថ្ងៃអង្គារ ទោះបីជាប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា ការចរចាជាមួយទីក្រុងតេហេរ៉ង់នៅតែកំពុងដំណើរការក៏ដោយ។
តម្លៃប្រេងឆៅអាមេរិក West Texas Intermediate (WTI) សម្រាប់ចែកចាយនៅខែកក្កដា បានកើនឡើងជាង ១% ដល់ ៩៤,៨១ ដុល្លារក្នុងមួយបារ៉ែល ខណៈតម្លៃប្រេងឆៅស្តង់ដារអន្តរជាតិ Brent សម្រាប់ចែកចាយនៅខែសីហា បានកើនឡើង ០,៨៨% ដល់ ៩៦,៨៤ ដុល្លារក្នុងមួយបារ៉ែល។
ទីបញ្ជាការកណ្តាលសហរដ្ឋអាមេរិក (CENTCOM) បានឱ្យដឹងកាលពីថ្ងៃអង្គារថា កងកម្លាំងរបស់ខ្លួនបានស្ទាក់បាញ់មីស៊ីលផ្លោង និងយន្តហោះគ្មានមនុស្សបើក (ដ្រូន) របស់អ៊ីរ៉ង់ជាច្រើនគ្រឿង ហើយបានបើកការវាយប្រហារការពារ បន្ទាប់ពីមាន «ការប៉ុនប៉ងវាយប្រហារ» ពីសំណាក់អ៊ីរ៉ង់ ដែលជាសញ្ញាបង្ហាញពីការកើនឡើងនៃភាពតានតឹងនៅតំបន់មជ្ឈិមបូព៌ា។
ការវិវត្តនេះបានកើតឡើងបន្ទាប់ពីលោក ត្រាំ និងរដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ (Marco Rubio) បានបញ្ជាក់ថា ទីក្រុងវ៉ាស៊ីនតោននៅតែបន្តចូលរួមក្នុងកិច្ចចរចាជាមួយអ៊ីរ៉ង់ ស្តីពីកិច្ចព្រមព្រៀងដែលអាចនាំទៅដល់ការបញ្ចប់ជម្លោះ ដោយច្រានចោលរបាយការណ៍របស់ប្រព័ន្ធផ្សព្វផ្សាយអ៊ីរ៉ង់ ដែលអះអាងថា ការប្រាស្រ័យទាក់ទងរវាងភាគីទាំងពីរបានបែកបាក់។
លោក រូប៊ីយ៉ូ ក៏បានប្រាប់គណៈកម្មាធិការទំនាក់ទំនងការបរទេសនៃព្រឹទ្ធសភាអាមេរិកថា ជាផ្នែកមួយនៃកិច្ចពិភាក្សាទាំងនេះ «មានលទ្ធភាព» ដែលអ៊ីរ៉ង់ «អាចចរចាលើទិដ្ឋភាពមួយចំនួននៃកម្មវិធីនុយក្លេអ៊ែររបស់ខ្លួន»។
ការលើកឡើងនេះផ្ទុយពីសេចក្តីរាយការណ៍របស់ទីភ្នាក់ងារសារព័ត៌មាន Fars របស់អ៊ីរ៉ង់ ដែលបានអះអាងកាលពីថ្ងៃអង្គារថា ទីក្រុងតេហេរ៉ង់ និងទីក្រុងវ៉ាស៊ីនតោន មិនបានផ្លាស់ប្តូរសារគ្នាអស់រយៈពេលជាច្រើនថ្ងៃមកហើយ។
ជាមួយគ្នានេះ សារព័ត៌មាន Tasnim ដែលមានទំនាក់ទំនងជាមួយរដ្ឋ បានរាយការណ៍កាលពីថ្ងៃចន្ទថា ក្រុមអ្នកចរចាអ៊ីរ៉ង់នឹងបញ្ឈប់ការប្រាស្រ័យទាក់ទងដោយប្រយោលជាមួយសហរដ្ឋអាមេរិក ហើយថា ទីក្រុងតេហេរ៉ង់នឹងស្វែងរកមធ្យោបាយបិទច្រកសមុទ្រ Hormuz ទាំងស្រុង ដែលជាច្រកដ៏សំខាន់សម្រាប់ការដឹកជញ្ជូនប្រេងឆៅពិភពលោក។
លោក ត្រាំ បានសរសេរនៅលើបណ្ដាញសង្គម Truth Social កាលពីរសៀលថ្ងៃអង្គារថា របាយការណ៍ដែលអះអាងថា សាធារណរដ្ឋអ៊ីស្លាមអ៊ីរ៉ង់ និងសហរដ្ឋអាមេរិក បានឈប់ទំនាក់ទំនងគ្នាកាលពីប៉ុន្មានថ្ងៃមុន គឺជា «ព័ត៌មានមិនពិត និងខុសទាំងស្រុង»។
ក្រុមអ្នកវិភាគនៅក្រុមហ៊ុន Fitch Group បានឱ្យដឹងកាលពីថ្ងៃអង្គារថា សង្គ្រាមរវាងសហរដ្ឋអាមេរិក និងអ៊ីរ៉ង់ បានបង្កឱ្យមានការរំខានយ៉ាងធ្ងន់ធ្ងរដល់វិស័យប្រេង និងឧស្ម័ននៅទូទាំងតំបន់មជ្ឈិមបូព៌ា ដោយការនាំចេញបានធ្លាក់ចុះខ្លាំង ផលិតកម្មត្រូវបានផ្អាក ហើយការវាយប្រហារម្តងហើយម្តងទៀតលើហេដ្ឋារចនាសម្ព័ន្ធ បានបន្សល់ទុកការខូចខាតរាប់ពាន់លានដុល្លារ និងពន្យារពេលដល់ការស្តារឡើងវិញ។
ក្រុមអ្នកវិភាគបានបន្ថែមថា ផ្អែកលើការវិភាគអំពីការរំខានដល់ផលិតកម្មដែលបណ្តាលមកពីជម្លោះ រយៈពេលដែលត្រូវការសម្រាប់ជួសជុលទ្រព្យសម្បត្តិដែលរងការខូចខាត និងរយៈពេលស្តារឡើងវិញនូវអណ្តូងប្រេងដែលត្រូវបានបិទដំណើរការ ពួកគេវាយតម្លៃថា ប្រទេសកាតា បារ៉ែន និងអ៊ីរ៉ាក់ គឺជាប្រទេសដែលរងផលប៉ះពាល់ធ្ងន់ធ្ងរជាងគេពីជម្លោះនេះ។
ពួកគេបានបញ្ជាក់ថា ការរំខានដល់ការផលិត និងការនាំចេញថាមពលនៅក្នុងតំបន់ អាចបន្តបង្កសម្ពាធលើទីផ្សារប្រេងពិភពលោកក្នុងរយៈពេលខាងមុខ ខណៈដែលវិនិយោគិនកំពុងតាមដានយ៉ាងដិតដល់នូវការវិវត្តនៃស្ថានការណ៍សន្តិសុខ និងកិច្ចចរចារវាងទីក្រុងវ៉ាស៊ីនតោន និងទីក្រុងតេហេរ៉ង់៕
