អាមេរិក និងអ៊ីរ៉ង់បាញ់តបតគ្នា ខណៈលោក Trump អះអាងថាបទឈប់បាញ់នៅតែមានប្រសិទ្ធភាព
អាមេរិក និងអ៊ីរ៉ង់បាញ់តបតគ្នា ខណៈលោក Trump អះអាងថាបទឈប់បាញ់នៅតែមានប្រសិទ្ធភាព
វ៉ាស៊ីនតោន៖ សហរដ្ឋអាមេរិក និងអ៊ីរ៉ង់ បានបាញ់តបតគ្នាកាលពីថ្ងៃព្រហស្បតិ៍ (៧ ឧសភា) ក្នុងអ្វីដែលត្រូវបានចាត់ទុកថាជាការសាកល្បងដ៏ធ្ងន់ធ្ងរបំផុតលើបទឈប់បាញ់រយៈពេលមួយខែរវាងប្រទេសទាំងពីរ។
ទោះជាយ៉ាងណា អ៊ីរ៉ង់បាននិយាយថា ស្ថានការណ៍បានវិលត្រឡប់មករកភាពប្រក្រតីវិញ ខណៈសហរដ្ឋអាមេរិកបានបញ្ជាក់ថា ខ្លួនមិនមានបំណងធ្វើឱ្យជម្លោះកាន់តែរីករាលដាលឡើយ។
យោធាអ៊ីរ៉ង់បានចោទថា សហរដ្ឋអាមេរិកបានកំណត់គោលដៅលើនាវាពីរគ្រឿងដែលចូលច្រកសមុទ្រ Hormuz និងបានវាយប្រហារលើទឹកដីអ៊ីរ៉ង់។ ជាការឆ្លើយតប យោធាអាមេរិកបានអះអាងថា ខ្លួនបានបាញ់តបវិញចំពោះការវាយប្រហាររបស់អ៊ីរ៉ង់។
លោក Donald Trump បានប្រាប់អ្នកយកព័ត៌មាន ABC ថា បទឈប់បាញ់នៅតែមានប្រសិទ្ធភាព ហើយបានព្យាយាមបន្ថយភាពតានតឹងនៃការប៉ះទង្គិច។ លោកក៏បានហៅហេតុការណ៍នេះថា គ្រាន់តែជា “ការប៉ះទង្គិចតិចតួច” ប៉ុណ្ណោះ។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា បន្ទាប់ពីការប៉ះទង្គិច ស្ថានការណ៍បានវិលត្រឡប់មករកភាពធម្មតាវិញ។
ភាពតានតឹងថ្មីនេះកើតឡើង ខណៈទីក្រុងវ៉ាស៊ីនតោនកំពុងរង់ចាំការឆ្លើយតបរបស់អ៊ីរ៉ង់ ចំពោះសំណើមួយដែលមានគោលបំណងបញ្ចប់ជម្លោះ ប៉ុន្តែមិនទាន់ដោះស្រាយបញ្ហាសំខាន់ៗ ដូចជាកម្មវិធីនុយក្លេអ៊ែររបស់អ៊ីរ៉ង់នៅឡើយ។
ចាប់តាំងពីបទឈប់បាញ់ចូលជាធរមានកាលពីថ្ងៃទី៧ ខែមេសា ភាគីទាំងពីរបានប៉ះទង្គិចគ្នាជាបន្តបន្ទាប់ម្តងម្កាល។
យោធាកំពូលរបស់អ៊ីរ៉ង់បានចោទសហរដ្ឋអាមេរិកថា បានរំលោភបទឈប់បាញ់ ដោយវាយប្រហារលើនាវាដឹកប្រេង និងតំបន់ឆ្នេរមួយចំនួន ខណៈសហរដ្ឋអាមេរិកបានបដិសេធថា មិនមានទ្រព្យសម្បត្តិយោធារបស់ខ្លួនណាមួយត្រូវបានវាយប្រហារឡើយ។ អ៊ីរ៉ង់អះអាងថា ខ្លួនបានឆ្លើយតបដោយការវាយប្រហារលើនាវាយោធាអាមេរិកនៅជិតច្រកសមុទ្រ Hormuz។
មន្ត្រីយោធាអាមេរិកបាននិយាយថា អ៊ីរ៉ង់បានប្រើមីស៊ីល ដ្រូន និងទូកតូចៗក្នុងការវាយប្រហារ ខណៈសហរដ្ឋអាមេរិកបានវាយតបវិញលើទីតាំងយោធា និងប្រព័ន្ធមីស៊ីលរបស់អ៊ីរ៉ង់។ ទន្ទឹមនឹងនេះ កងទ័ពអាមេរិកបានបញ្ជាក់ថា ខ្លួននៅតែត្រៀមខ្លួនជាស្រេចដើម្បីការពារកម្លាំងរបស់ខ្លួន និងមិនស្វែងរកការកើនឡើងនៃជម្លោះឡើយ។
ក្រោយមក ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា ស្ថានការណ៍នៅតំបន់ក្បែរច្រកសមុទ្រ Hormuz បានវិលត្រឡប់មករកភាពធម្មតាវិញ បន្ទាប់ពីមានការបាញ់ប្រហារអស់ជាច្រើនម៉ោង។ នេះមិនមែនជាលើកទីមួយទេ ដែលភាគីទាំងពីរបានប៉ះទង្គិចគ្នាក្រោយបទឈប់បាញ់ ដោយកាលពីដើមសប្តាហ៍ ក៏មានការបំផ្លាញទូកតូចៗ និងការស្ទាក់ចាប់មីស៊ីល និងដ្រូនផងដែរ។
បន្ទាប់មក សហរដ្ឋអាមេរិកបានដាក់សំណើមួយសម្រាប់បញ្ចប់ជម្លោះជាផ្លូវការ ប៉ុន្តែសំណើនោះនៅមិនទាន់ដោះស្រាយបញ្ហាសំខាន់ៗ ដូចជាកម្មវិធីនុយក្លេអ៊ែររបស់អ៊ីរ៉ង់ និងស្ថានភាពច្រកសមុទ្រ Hormuz ដែលជាចំណុចដឹកជញ្ជូនប្រេងសំខាន់របស់ពិភពលោក។
ក្រៅពីនេះ សហរដ្ឋអាមេរិកក៏បានដាក់ទណ្ឌកម្មថ្មីលើមន្ត្រី និងមេដឹកនាំកងជីវពលមួយចំនួនដែលមានទំនាក់ទំនងជាមួយអ៊ីរ៉ង់ផងដែរ។
ស្របពេលគ្នា អ៊ីស្រាអែលបាននិយាយថា ខ្លួនបានវាយប្រហារលើមេបញ្ជាការក្រុម Hezbollah នៅទីក្រុង Beirut ដែលជាការវាយប្រហារលើកដំបូងលើរដ្ឋធានីលីបង់ ចាប់តាំងពីបទឈប់បាញ់នៅទីនោះត្រូវបានព្រមព្រៀង។
ការបញ្ឈប់ការវាយប្រហាររបស់អ៊ីស្រាអែលនៅលីបង់ គឺជាការទាមទារសំខាន់មួយរបស់អ៊ីរ៉ង់ក្នុងកិច្ចចរចាជាមួយសហរដ្ឋអាមេរិក៕
