លោកត្រាំ ផ្អាកគម្រោងនាំនាវាចេញពីច្រកសមុទ្រ Hormuz ខណៈមានវឌ្ឍនភាពក្នុងការចរចាជាមួយអ៊ីរ៉ង់
លោកត្រាំ ផ្អាកគម្រោងនាំនាវាចេញពីច្រកសមុទ្រ Hormuz ខណៈមានវឌ្ឍនភាពក្នុងការចរចាជាមួយអ៊ីរ៉ង់
ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃអង្គារថា លោកកំពុងផ្អាក “គម្រោងសេរីភាព” (Project Freedom) ដែលជាប្រតិបត្តិការរបស់យោធាអាមេរិកក្នុងការនាំនាវាពាណិជ្ជកម្មឱ្យចេញពីច្រកសមុទ្រ Hormuz បន្ទាប់ពីប្រតិបត្តិការនេះទើបតែចាប់ផ្តើមបានមួយថ្ងៃប៉ុណ្ណោះ។
ក្នុងសារបង្ហោះលើបណ្ដាញសង្គម Truth Social លោក ត្រាំ បានបញ្ជាក់ថា ការសម្រេចចិត្តនេះផ្អែកលើ “វឌ្ឍនភាពដ៏ធំធេង” ក្នុងការចរចាដើម្បីឈានទៅរកកិច្ចព្រមព្រៀងពេញលេញ និងចុងក្រោយជាមួយប្រទេសអ៊ីរ៉ង់។ លោកបានបន្ថែមថា គម្រោងនេះនឹងត្រូវផ្អាកជាបណ្តោះអាសន្ន ដើម្បីរង់ចាំមើលថាតើកិច្ចព្រមព្រៀងអាចត្រូវបានបញ្ចប់ និងចុះហត្ថលេខាបានឬអត់។
ការប្រកាសនេះបានធ្វើឲ្យតម្លៃភាគហ៊ុនអនាគតកើនឡើង ខណៈវាបានបង្កើនក្តីសង្ឃឹមថា អាចមានកិច្ចព្រមព្រៀងសន្តិភាព ដែលនឹងបញ្ចប់ជម្លោះពាក់ព័ន្ធអាមេរិក អ៊ីស្រាអែល និងអ៊ីរ៉ង់ និងបើកច្រកសមុទ្រ Hormuz ដែលមានសារៈសំខាន់សម្រាប់សេដ្ឋកិច្ចពិភពលោកឡើងវិញ។
ទោះយ៉ាងណា ការសម្រេចចិត្តនេះក៏ត្រូវបានមើលថាជាការផ្លាស់ប្តូរយ៉ាងឆាប់រហ័សពីមុននេះប៉ុន្មានម៉ោងប៉ុណ្ណោះ ដែលរដ្ឋបាលលោក ត្រាំ បានលើកឡើងថា គម្រោងនេះពាក់ព័ន្ធនឹងជីវិត និងសុវត្ថិភាពរបស់នាវិកស៊ីវិលរាប់ពាន់នាក់។
តាមការបញ្ជាក់របស់រដ្ឋបាលអាមេរិក មាននាវិកប្រហែល ២៣,០០០ នាក់ ពី ៨៧ ប្រទេស កំពុងជាប់គាំងនៅក្នុងឈូងសមុទ្រពែក្ស ដោយសារការបិទច្រកសមុទ្រ Hormuz របស់អ៊ីរ៉ង់។
រដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ បានថ្លែងនៅសេតវិមានថា គោលបំណងនៃគម្រោងនេះគឺដើម្បី “ជួយសង្គ្រោះ” នាវិកទាំងនោះ ដែលត្រូវបានបោះបង់ចោលឲ្យប្រឈមនឹងការស្លាប់ដោយសាររបបអ៊ីរ៉ង់។
លោកបានបន្ថែមថា ប្រជាជាតិជាច្រើនជុំវិញពិភពលោក ដែលភាគច្រើនមិនបានចូលរួមក្នុងជម្លោះយោធា កំពុងប្រឈមនឹងហានិភ័យ មិនត្រឹមតែបាត់បង់ទំនិញប៉ុណ្ណោះទេ ប៉ុន្តែអាចបាត់បង់ជីវិតប្រជាពលរដ្ឋរបស់ពួកគេផងដែរ។
លោក រូប៊ីយ៉ូ បានព្រមានថា នាវិកទាំងនេះកំពុងស្ថិតក្នុងស្ថានភាពងាយរងគ្រោះ ដាច់ដោយឡែក ខ្វះអាហារ ហើយយ៉ាងហោចណាស់មានមនុស្ស ១០ នាក់ បានស្លាប់រួចហើយដោយសារការបិទផ្លូវនេះ។
មុននេះ លោក ត្រាំ បានប្រកាស “Project Freedom” កាលពីថ្ងៃអាទិត្យ ដោយនិយាយថា សហរដ្ឋអាមេរិកនឹងជួយណែនាំនាវារបស់ប្រទេសផ្សេងៗឱ្យចេញពីផ្លូវទឹកដែលត្រូវបានរឹតត្បិតនេះដោយសុវត្ថិភាព។
បញ្ជាការកណ្ដាលសហរដ្ឋអាមេរិក (CENTCOM) បានឲ្យដឹងថា ប្រតិបត្តិការនេះគ្រោងដាក់ពង្រាយនាវាពិឃាតមីស៊ីលណែនាំ យន្តហោះលើគោក និងលើសមុទ្រជាង ១០០ គ្រឿង វេទិកាគ្មានមនុស្សបើកពហុដែន និងកម្លាំងយោធាប្រមាណ ១៥,០០០ នាក់ ដើម្បីគាំទ្រប្រតិបត្តិការនេះ។
ទោះបីជាយ៉ាងណា អ្នកជំនាញផ្នែកសន្តិសុខ និងភូមិសាស្ត្រនយោបាយមួយចំនួន បានបង្ហាញការសង្ស័យថា គម្រោងនេះអាចមិនអាចសម្រេចបានគោលដៅរបស់ខ្លួន។
នៅពេលដូចគ្នា អ៊ីរ៉ង់បានឆ្លើយតបនឹងចលនាយោធារបស់អាមេរិកជាមួយនឹងសកម្មភាពអរិភាពថ្មីៗ ដែលបានបង្កើនសម្ពាធលើបទឈប់បាញ់ដែលមានភាពរង្គោះរង្គើរួចមកហើយ។
អេមីរ៉ាតអារ៉ាប់រួមបាននិយាយថា ខ្លួនត្រូវបានវាយប្រហារដោយមីស៊ីលផ្លោង មីស៊ីលគ្រូស និងដ្រូនពីអ៊ីរ៉ង់ ដែលបណ្តាលឲ្យមានអ្នករងរបួស ៣ នាក់។
មេបញ្ជាការ CENTCOM លោក អេដមីរ៉ាល់ ប្រេដ ខូផើរ បាននិយាយថា កងឆ្មាំបដិវត្តន៍អ៊ីស្លាមអ៊ីរ៉ង់ បានបាញ់មីស៊ីលគ្រូស ដ្រូន និងប្រើទូកតូចៗ ដើម្បីវាយប្រហារលើនាវាដែលកំពុងត្រូវបានការពារ។
នាវាមួយដែលដំណើរការដោយកូរ៉េខាងត្បូង ក៏បានឆាបឆេះនៅច្រកសមុទ្រ Hormuz កាលពីថ្ងៃចន្ទ ហើយលោក ត្រាំ បានអះអាងថា អ៊ីរ៉ង់ជាអ្នកនៅពីក្រោយការវាយប្រហារនេះ។
ក្នុងសាររបស់លោក លោក ត្រាំ ក៏បានបញ្ជាក់ថា លោកយល់ដឹងយ៉ាងច្បាស់ថា តំណាងរបស់លោកកំពុងធ្វើការចរចាវិជ្ជមានជាមួយអ៊ីរ៉ង់ ហើយការពិភាក្សាទាំងនេះអាចនាំទៅរកលទ្ធផលល្អសម្រាប់ភាគីទាំងអស់។ លោកបានបន្ថែមថា ចលនានាវានេះមានគោលបំណងតែដើម្បីជួយដោះលែងមនុស្ស ក្រុមហ៊ុន និងប្រទេស ដែលមិនបានធ្វើអ្វីខុសទាល់តែសោះ ប៉ុន្តែក្លាយជាជនរងគ្រោះនៃស្ថានភាពបច្ចុប្បន្ន៕