លោក Duterte នឹងត្រូវជំនុំជម្រះពីបទឃាតកម្មជាច្រើនករណី ក្នុងអំឡុងពេលកាន់តំណែង

លោក Duterte នឹងត្រូវជំនុំជម្រះពីបទឃាតកម្មជាច្រើនករណី ក្នុងអំឡុងពេលកាន់តំណែង

AP ៖ ចៅក្រមនៅតុលាការឧក្រិដ្ឋកម្មអន្តរជាតិ (ICC) កាលពីថ្ងៃព្រហស្បតិ៍ បានបញ្ជាក់ការចោទពីបទឧក្រិដ្ឋកម្មប្រឆាំងមនុស្សជាតិ ប្រឆាំងនឹងអតីតប្រធានាធិបតីហ្វីលីពីន លោក Rodrigo Duterte ពាក់ព័ន្ធនឹងយុទ្ធនាការបង្ក្រាបគ្រឿងញៀនដ៏ឃោរឃៅ ដែលត្រូវបានចោទថាលោកបានគ្រប់គ្រងនៅពេលកាន់តំណែង។

ក្រុមចៅក្រមបីរូប បានសម្រេចជាឯកច្ឆន្ទថា មានមូលហេតុគ្រប់គ្រាន់ក្នុងការជឿថា អតីតមេដឹកនាំរូបនេះទទួលខុសត្រូវចំពោះឃាតកម្មជាច្រើនករណី ដំបូងនៅពេលលោកជាអភិបាលក្រុង Davao ភាគខាងត្បូងប្រទេស ហើយបន្តមកទៀតនៅពេលលោកក្លាយជាប្រធានាធិបតី។

លោក Duterte ដែលបានកាន់តំណែងពីឆ្នាំ២០១៦ ដល់ឆ្នាំ២០២២ ត្រូវបានចាប់ខ្លួននៅក្នុងប្រទេសហ្វីលីពីនកាលពីឆ្នាំមុន ហើយត្រូវបានបញ្ជូនទៅកាន់ទីក្រុងឡាអេ ដែលជាទីតាំងរបស់តុលាការ ICC។ លោកបានបដិសេធការចោទប្រកាន់ទាំងអស់។

នៅក្នុងសេចក្ដីសម្រេចប្រវែង ៥០ ទំព័រ ចៅក្រមបានបញ្ជាក់ថា ភស្តុតាងបង្ហាញថា លោក Duterte អាយុ ៨១ ឆ្នាំ បាន «បង្កើត ផ្សព្វផ្សាយ និងអនុវត្ត» គោលនយោបាយមួយ ដើម្បី «បំបាត់» ជនសង្ស័យឧក្រិដ្ឋកម្ម។

យោងតាមព្រះរាជអាជ្ញា មន្ត្រីប៉ូលិស និងសមាជិកក្រុមសម្លាប់ បានអនុវត្តឃាតកម្មជាច្រើនករណី តាមការបញ្ជា ឬការលើកទឹកចិត្តរបស់លោក Duterte ចាប់តាំងពីឆ្នាំ២០១១ ដោយមួយចំនួនត្រូវបានជំរុញដោយប្រាក់រង្វាន់ ឬដើម្បីជៀសវាងការក្លាយជាគោលដៅដោយខ្លួនឯង។

ព្រះរាជអាជ្ញារង លោក Mame Mandiaye Niang បាននិយាយថា សម្រាប់មនុស្សមួយចំនួន ការសម្លាប់បានក្លាយជាការប្រកួតប្រជែងបែបវិកលចរិត។
ការប៉ាន់ប្រមាណចំនួនអ្នកស្លាប់មានភាពខុសគ្នា ពីជាង ៦,០០០ នាក់ តាមការរាយការណ៍របស់ប៉ូលិស ទៅដល់ប្រមាណ ៣០,០០០ នាក់ តាមការអះអាងរបស់ក្រុមសិទ្ធិមនុស្ស។

ព្រះរាជអាជ្ញាបាននិយាយថា ការសម្រេចចិត្តនេះជាជំហានសំខាន់មួយក្នុងការនាំមកនូវការទទួលខុសត្រូវ។

មេធាវីការពារក្តីលោក Duterte គឺ លោក Nick Kaufman បាននិយាយថា លោកមានការខកចិត្ត ដោយអះអាងថាសេចក្ដីសម្រេចនេះផ្អែកលើសក្ខីកម្មដែលមិនបានបញ្ជាក់ពីអ្នកសម្លាប់ដែលសារភាពដោយខ្លួនឯង។

កាលបរិច្ឆេទសវនាការមិនទាន់ត្រូវបានកំណត់នៅឡើយទេ។ លោក Duterte មិនបានចូលរួមសវនាការមុនៗទេ ដោយបានលះបង់សិទ្ធិក្នុងការបង្ហាញខ្លួន។

នៅប្រទេសហ្វីលីពីន ក្រុមគ្រួសារជនរងគ្រោះបានស្វាគមន៍ការសម្រេចចិត្តនេះ។ លោក Randy delos Santos បាននិយាយថា ជនរងគ្រោះជាច្រើនមិនបានទទួលឱកាសសូម្បីតែឱ្យគេដឹងថាពួកគេជាជនរងគ្រោះឡើយ ព្រោះរឿងរ៉ាវរបស់ពួកគេត្រូវបានបំលែងក្នុងរបាយការណ៍ប៉ូលិស។

លោកបានបន្ថែមថា ភាគច្រើនជនរងគ្រោះគ្មានឈ្មោះ គ្មានសំឡេង ហើយគ្រាន់តែជាលេខក្នុងស្ថិតិ ប៉ុន្តែឥឡូវនេះ តុលាការ ICC នឹងផ្តល់ឱកាសឱ្យរឿងរ៉ាវរបស់ពួកគេត្រូវបានប្រាប់។

ក្រុមសិទ្ធិមនុស្សបានសរសើរការសម្រេចចិត្តនេះ។ លោកស្រី Maria Elena Vignoli បាននិយាយថា ការជំនុំជម្រះនេះនឹងបញ្ជាក់ថា គ្មាននរណាម្នាក់លើសច្បាប់ឡើយ។

កាលពីឆ្នាំ២០១៨ អយ្យការដ្ឋាន ICC បានបើកការស៊ើបអង្កេតបឋម។ បន្ទាប់មក លោក Duterte បានប្រកាសដកហ្វីលីពីនចេញពីតុលាការ។
កាលពីថ្ងៃអង្គារ ចៅក្រមឧទ្ធរណ៍បានបដិសេធសំណើលុបចោលសំណុំរឿង។

កាលពីខែតុលា ចៅក្រមបានដកលោក Karim Khan ចេញពីសំណុំរឿងនេះ ដោយសារការព្រួយបារម្ភអំពីភាពលម្អៀង។ លោកក៏បានដកខ្លួនបណ្តោះអាសន្ន ពេលកំពុងរង់ចាំលទ្ធផលស៊ើបអង្កេតលើការចោទប្រកាន់អំពីអំពើផ្លូវភេទមិនសមរម្យ៕