លោក ត្រាំ អះអាងថា នាយករដ្ឋមន្ត្រីឥណ្ឌា យល់ព្រមឈប់ទិញប្រេងរុស្ស៊ី

លោក ត្រាំ អះអាងថា នាយករដ្ឋមន្ត្រីឥណ្ឌា យល់ព្រមឈប់ទិញប្រេងរុស្ស៊ី

វ៉ាស៊ីនតោន៖ លោក ដូណាល់ ត្រាំ ប្រធានាធិបតីសហរដ្ឋអាមេរិក បាននិយាយថា លោកនឹងកាត់បន្ថយពន្ធគយលើទំនិញឥណ្ឌា ពី ៥០% មកនៅត្រឹម ១៨% បន្ទាប់ពីលោកអះអាងថា នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានយល់ព្រមឈប់ទិញប្រេងពីប្រទេសរុស្ស៊ី និងបង្កើនការទិញទំនិញពីសហរដ្ឋអាមេរិក ក្នុងតម្លៃលើស ៥០០ ពាន់លានដុល្លារ។

លោក ត្រាំ បានប្រកាសពីការបញ្ចប់ “សង្គ្រាមពាណិជ្ជកម្ម” រយៈពេលជាច្រើនខែជាមួយឥណ្ឌា កាលពីម្សិលមិញ តាមរយៈបណ្ដាញ Truth Social របស់លោក បន្ទាប់ពីសហរដ្ឋអាមេរិកបានដាក់ពន្ធគយខ្ពស់បំផុតមួយចំនួនលើឥណ្ឌាកាលពីឆ្នាំមុន។

លោកបានសរសេរថា៖ «ដោយសារមិត្តភាព និងការគោរពចំពោះលោកនាយករដ្ឋមន្ត្រី ម៉ូឌី និងតាមសំណើរបស់លោក ដែលមានប្រសិទ្ធភាពភ្លាមៗ យើងបានឈានដល់កិច្ចព្រមព្រៀងពាណិជ្ជកម្មរវាងសហរដ្ឋអាមេរិក និងឥណ្ឌា ដែលអនុញ្ញាតឱ្យសហរដ្ឋអាមេរិកកាត់បន្ថយពន្ធគយ ពី ២៥% មកនៅ ១៨%»។

ប្រធានាធិបតីអាមេរិករូបនេះ ក៏បានបញ្ជាក់ថា លោក និងលោក ម៉ូឌី បានពិភាក្សាអំពីលទ្ធភាពដែលឥណ្ឌានឹងបង្កើនការទិញប្រេងពីសហរដ្ឋអាមេរិក និងសូម្បីតែពីប្រទេសវេណេស៊ុយអេឡា ក្នុងចំណោមប្រធានបទផ្សេងៗទៀត។

លោក ត្រាំ ដែលពីមុនធ្លាប់ហៅលោក ម៉ូឌី ថា ជា «មិត្តដ៏អស្ចារ្យ» បានចោទប្រកាន់ឥណ្ឌាថា ការនាំចូលប្រេងឆៅប្រហែល ៩០% នៃតម្រូវការរបស់ខ្លួន បានជួយផ្តល់មូលនិធិដល់សង្គ្រាមរបស់ទីក្រុងម៉ូស្គូ ក្នុងសង្គ្រាមនៅប្រទេសអ៊ុយក្រែន។

កាលពីខែសីហា ឆ្នាំមុន លោក ត្រាំ បានដាក់ទណ្ឌកម្មបន្ថែម ២៥% លើឥណ្ឌា ជុំវិញការទិញប្រេងរុស្ស៊ី បន្ថែមលើអត្រាពន្ធគយដើម ២៥% ដែលធ្វើឱ្យកាតព្វកិច្ចសរុបឡើងដល់ ៥០% ក្នុងចំណោមកម្រិតខ្ពស់បំផុតនៅលើពិភពលោក។

មន្ត្រីអាមេរិកបាននិយាយថា ការយល់ព្រមរបស់ឥណ្ឌា ក្នុងការបញ្ឈប់ការទិញប្រេងរុស្ស៊ី អាចនាំឱ្យមានការដកចេញនូវទណ្ឌកម្មទាំងនេះ។ ទោះជាយ៉ាងណា អ្នកវិភាគមួយចំនួនបានសម្ដែងការងឿងឆ្ងល់ថា ឥណ្ឌានឹងអាចបង្កើនការទិញប្រេងពីសហរដ្ឋអាមេរិកបានច្រើនដូចការអះអាងរបស់លោក ត្រាំ ឬអត់ ខណៈពាណិជ្ជកម្មទ្វេភាគីសរុបរវាងប្រទេសទាំងពីរ មានតម្លៃប្រមាណ ២១២ ពាន់លានដុល្លារ នៅឆ្នាំ២០២៤៕