លោក Trump ប្រកាសនៅទីក្រុង Davos ថា អាមេរិក ត្រូវតែយក កោះ Greenland ប៉ុន្តែបដិសេធការប្រើកម្លាំងយោធា

លោក Trump ប្រកាសនៅទីក្រុង Davos ថា អាមេរិក ត្រូវតែយក កោះ Greenland ប៉ុន្តែបដិសេធការប្រើកម្លាំងយោធា

DAVOS, ស្វីស — ប្រធានាធិបតីសហរដ្ឋអាមេរិក លោក Donald Trump បានបង្កការភ្ញាក់ផ្អើលយ៉ាងខ្លាំង នៅក្នុងសុន្ទរកថាមួយទៅកាន់មេដឹកនាំពិភពលោក និងអ្នកធុរកិច្ច នៅវេទិកាសេដ្ឋកិច្ចពិភពលោក (World Economic Forum) កាលពីថ្ងៃពុធ ទី២១ ខែមករា ឆ្នាំ២០២៦ ដោយប្រកាសជាថ្មីថា សហរដ្ឋអាមេរិក «ត្រូវតែទទួលបាន» កោះ Greenland ដែលស្ថិតក្រោមអធិបតេយ្យភាពរបស់ប្រទេសដាណឺម៉ាក។

លោក Trump បានហៅ Greenland ថាជា «ទឹកដីរបស់យើង» និងបានពិពណ៌នាកោះដ៏ធំនេះថា ជាតំបន់យុទ្ធសាស្ត្រសំខាន់សម្រាប់សន្តិសុខជាតិ និងស្ថិរភាពសកល។ លោកបានថ្លែងថា៖ «វាជាដុំទឹកកកដ៏ធំមួយ ប៉ុន្តែយើងត្រូវការវា ដើម្បីការពារពិភពលោក»។

ទោះជាយ៉ាងណា ចំពោះការព្រួយបារម្ភពីសហគមន៍អន្តរជាតិ លោក Trump បានបញ្ជាក់យ៉ាងច្បាស់ថា លោកមិនមានបំណងប្រើកម្លាំងយោធា ដើម្បីដណ្ដើមយកកោះ Greenland នោះទេ។ «យោធាមិនស្ថិតនៅលើតុចរចាទេ… ខ្ញុំមិនចង់ប្រើកម្លាំងបាយទេ ហើយវាក៏មិនចាំបាច់ដែរ» លោកបានបន្ថែម។

ប៉ុន្តែជាមួយគ្នានេះ លោកបានបញ្ចេញសម្ពាធនយោបាយទៅលើប្រទេសដាណឺម៉ាក និងសម្ព័ន្ធមិត្តអឺរ៉ុប ដោយព្រមានថា ការបដិសេធមិនសហការជាមួយសហរដ្ឋអាមេរិក អាចនាំឱ្យមានផលវិបាកក្នុងទំនាក់ទំនងទ្វេភាគី។ «អ្នកអាចនិយាយថា ‘យល់ព្រម’ ហើយយើងនឹងដឹងគុណយ៉ាងខ្លាំង ឬអ្នកអាចនិយាយថា ‘ទេ’ ហើយយើងនឹងចងចាំទុក» លោក Trump បាននិយាយ។

នៅក្នុងសុន្ទរកថាដដែលនេះ ប្រធានាធិបតីអាមេរិកក៏បានបង្ហើបពីអ្វីដែលលោកហៅថា «ក្របខ័ណ្ឌនៃកិច្ចព្រមព្រៀងនាពេលអនាគត» ជាមួយអគ្គលេខាធិការអង្គការ NATO លោក Mark Rutte ដែលអាចអនុញ្ញាតឱ្យសហរដ្ឋអាមេរិក ដំឡើងប្រព័ន្ធការពារមីស៊ីល “Golden Dome” នៅលើកោះ Greenland ដើម្បីទប់ស្កាត់ឥទ្ធិពលយោធារបស់រុស្ស៊ី និងចិន ក្នុងតំបន់អាកទិក។

ប្រតិកម្មអន្តរជាតិ

រដ្ឋាភិបាលដាណឺម៉ាក និងអាជ្ញាធរមូលដ្ឋាននៅកោះ Greenland បានច្រានចោលយ៉ាងតឹងរ៉ឹងម្តងហើយម្តងទៀត នូវគំនិតលក់ ឬផ្ទេរកម្មសិទ្ធិទឹកដីនេះ ដោយសង្កត់ធ្ងន់ថា «Greenland មិនមែនសម្រាប់លក់ទេ»។

ទោះជាយ៉ាងណា ទីផ្សារហិរញ្ញវត្ថុអន្តរជាតិបានបង្ហាញសញ្ញាធូរស្រាលខ្លះៗ បន្ទាប់ពីលោក Trump បញ្ជាក់ថា លោកមិនមានគម្រោងប្រើសង្គ្រាម ដើម្បីសម្រេចគោលដៅនយោបាយរបស់ខ្លួនឡើយ៕

https://www.cnbc.com/2026/01/21/trump-greenland-tariffs-davos-europe.html