បុរសជប៉ុនម្នាក់ ត្រូវបានចាប់ខ្លួនពីបទកក់បន្ទប់សណ្ឋាគារក្លែងក្លាយ ៥៨០ បន្ទប់ ធ្វើឱ្យម្ចាស់សណ្ឋាគារខាតលុយជាង ១០ ម៉ឺនដុល្លារ

បុរសជប៉ុនម្នាក់ ត្រូវបានចាប់ខ្លួនពីបទកក់បន្ទប់សណ្ឋាគារក្លែងក្លាយ ៥៨០ បន្ទប់ ធ្វើឱ្យម្ចាស់សណ្ឋាគារខាតលុយជាង ១០ ម៉ឺនដុល្លារ

ជប៉ុន៖ បុរសម្នាក់មកពីទីក្រុង Izumo ខេត្ត Shimane ប្រទេសជប៉ុន ត្រូវបានចាប់ខ្លួនពីបទសង្ស័យថា បានកក់បន្ទប់សណ្ឋាគារក្លែងក្លាយប្រមាណ ៥៨០ បន្ទប់ នៅក្បែរអាកាសយានដ្ឋាន Haneda ក្នុងទីក្រុងតូក្យូ។

បើតាមការចុះផ្សាយរបស់កាសែត The Nation របស់ថៃ បានឱ្យដឹងថា ការកក់ក្លែងក្លាយទាំងនេះ ត្រូវបានធ្វើឡើងកាលពីខែធ្នូ ឆ្នាំមុន ហើយត្រូវបានគេជឿថា បានបង្កការខូចខាតជាង ១៧ លានយ៉េន (ប្រហែល ១០៨,០០០ ដុល្លារអាមេរិក) ដល់សណ្ឋាគារ។

ការចោទប្រកាន់ជាក់លាក់ដែលទាក់ទងនឹងការចាប់ខ្លួន គឺពាក់ព័ន្ធនឹងការកក់បន្ទប់សរុប ២៥៨ បន្ទប់ ក្រោមឈ្មោះក្លែងក្លាយនៅសណ្ឋាគារមួយក្នុងសង្កាត់ Ota ទីក្រុងតូក្យូ ចន្លោះថ្ងៃទី ១៦ ដល់ ១៩ ខែធ្នូ ឆ្នាំមុន។

ទង្វើនេះត្រូវបានចាត់ទុកថាជាការរារាំងដល់អាជីវកម្មរបស់សណ្ឋាគារ។ បុរសរូបនេះបានបដិសេធការចោទប្រកាន់ ដោយអះអាងថាគាត់មិនបានបញ្ចូលព័ត៌មានមិនពិតណាមួយឡើយ។

ការស៊ើបអង្កេតបានបង្ហាញថា នៅពេលដែលបទល្មើសនេះត្រូវបានប្រព្រឹត្ត បុរសរូបនេះធ្លាប់ជាអ្នកវិទ្យាសាស្ត្រមន្ទីរពិសោធន៍វេជ្ជសាស្ត្រជីវសាស្រ្តនៅមន្ទីរពេទ្យសាកលវិទ្យាល័យ Shimane ។ លោក ត្រូវបានគេរាយការណ៍ថា បានចូលប្រើគេហទំព័រកក់បន្ទប់តាមរយៈមធ្យោបាយជាច្រើន រួមទាំងកុំព្យូទ័ររបស់គាត់សម្រាប់ប្រើប្រាស់ក្នុងអាជីវកម្មផងដែរ។

ប៉ូលិសកំពុងស៊ើបអង្កេតពីមូលហេតុដែលអាចកើតមាន៖ បុរសរូបនេះធ្លាប់បានស្នាក់នៅសណ្ឋាគារដដែលកាលពីខែវិច្ឆិកា ឆ្នាំមុន ហើយបានត្អូញត្អែរទៅសណ្ឋាគារអំពីអាកប្បកិរិយារបស់បុគ្គលិក។ អាជ្ញាធរកំពុងពិនិត្យមើលថាតើការត្អូញត្អែរពីមុននេះ មានទំនាក់ទំនងទៅនឹងទង្វើដែលចោទប្រកាន់របស់គាត់ដែរឬទេ៕