ទីក្រុងហូជីមិញ ត្រៀមហាមឃាត់ការប្រើប្រាស់ទូរស័ព្ទក្នុងសាលា ចាប់ពីឆ្នាំសិក្សា ២០២៥-២០២៦

ទីក្រុងហូជីមិញ ត្រៀមហាមឃាត់ការប្រើប្រាស់ទូរស័ព្ទក្នុងសាលា ចាប់ពីឆ្នាំសិក្សា ២០២៥-២០២៦

ទីក្រុងហូជីមិញ៖ អាជ្ញាធរទីក្រុងហូជីមិញ ប្រទេសវៀតណាម កំពុងរៀបចំផែនការអនុវត្តការហាមឃាត់ការប្រើប្រាស់ទូរស័ព្ទចល័តរបស់សិស្សានុសិស្សនៅក្នុងបរិវេណសាលារៀន ចាប់ពីឆ្នាំសិក្សា ២០២៥-២០២៦ តទៅ។
ការហាមឃាត់នេះនឹងគ្របដណ្តប់ទាំងម៉ោងសិក្សា និងពេលសម្រាក លុះត្រាតែមានការអនុញ្ញាតជាក់លាក់ពីគ្រូបង្រៀន។

លោក Nguyen Van Hieu នាយកនាយកដ្ឋានអប់រំនិងបណ្ដុះបណ្ដាលទីក្រុងហូជីមិញ បានបញ្ជាក់ថា គំនិតផ្តួចផ្តើមនេះមានគោលបំណងចម្បង កាត់បន្ថយការរំខានដោយបច្ចេកវិទ្យាឌីជីថល និង បង្កើនការផ្ដោតអារម្មណ៍នៅក្នុងថ្នាក់រៀន។ ជាមួយគ្នានេះ វាក៏នឹងជួយជំរុញឱ្យសិស្សានុសិស្សចូលរួមសកម្មភាពរាងកាយ និងអន្តរកម្មសង្គមផ្ទាល់ខ្លួនក្នុងម៉ោងសិក្សាផងដែរ។

សាលារៀននានានឹងត្រូវទទួលភារកិច្ចរៀបចំសកម្មភាពមានរចនាសម្ព័ន្ធកាន់តែច្បាស់លាស់ក្នុងអំឡុងពេលសម្រាក ដូចជាកីឡា និងល្បែងកម្សាន្តជាក្រុម ដើម្បីជួយសិស្សបង្កើតទំនាក់ទំនង និងរក្សាសកម្មភាព។ ថ្នាក់ដឹកនាំសាលាជាច្រើនក្នុងទីក្រុង ដែលបានអនុវត្តគោលការណ៍គ្មានទូរស័ព្ទរួចហើយ បានរាយការណ៍ពីលទ្ធផលវិជ្ជមាន។ ទោះបីជាមានការជំទាស់ដំបូងពីសិស្សមួយចំនួនក៏ដោយ ក៏ភាគច្រើនទីបំផុតបានផ្ដោតអារម្មណ៍កាន់តែខ្លាំងអំឡុងពេលរៀន និងចូលរួមជាមួយមិត្តភក្ដិកាន់តែសកម្មក្នុងពេលសម្រាក។

ការស្ទង់មតិមួយកាលពីខែតុលា ឆ្នាំ២០២៤ បានបង្ហាញថា ប្រមាណ ៨៣% នៃអ្នកឆ្លើយតបជិត ៣,៦០០ នាក់ បានគាំទ្រយ៉ាងពេញទំហឹងចំពោះការហាមឃាត់ទូរស័ព្ទនៅក្នុងសាលារៀន។ បច្ចុប្បន្ន ក្រសួងអប់រំនិងបណ្ដុះបណ្ដាលវៀតណាម អនុញ្ញាតឱ្យសិស្សប្រើប្រាស់ទូរស័ព្ទអំឡុងពេលរៀនប្រសិនបើមានការយល់ព្រមពីគ្រូ និងមិនបានរឹតបន្តឹងការប្រើប្រាស់អំឡុងពេលសម្រាកឡើយ។ ដូច្នេះ គោលនយោបាយដែលទីក្រុងហូជីមិញស្នើឡើងនេះ តំណាងឱ្យការរឹតបន្តឹងច្បាប់យ៉ាងសំខាន់ និងអាចបង្កើតជាគំរូសម្រាប់កំណែទម្រង់ទូទាំងប្រទេស។
ការសម្រេចចិត្តនេះកើតឡើងចំពេលមានកង្វល់កាន់តែខ្លាំងឡើងអំពីបញ្ហា ការញៀនអេក្រង់ ក្នុងចំណោមយុវវ័យ។

ការសិក្សារបស់ UNESCO កាលពីឆ្នាំ២០២៣ ដែលបានធ្វើឡើងនៅក្នុង ១៤ ប្រទេស បានរកឃើញថា ស្មាតហ្វូនបានកាត់បន្ថយការផ្ដោតអារម្មណ៍ផ្នែកសិក្សា និងសុខុមាលភាពផ្លូវចិត្តរបស់សិស្ស។ អ្នកស្រាវជ្រាវបានបញ្ជាក់ថា ការប្រើប្រាស់ទូរស័ព្ទច្រើនហួសប្រមាណអាចនាំឱ្យមាន ការថប់បារម្ភ និងជំងឺធ្លាក់ទឹកចិត្ត ដែលធ្វើឱ្យសិស្សពិបាកក្នុងការបន្តការសិក្សាឡើងវិញ។

អ្នកជំនាញបានផ្តល់អនុសាសន៍ឱ្យមានការកែទម្រង់ជាច្រើន រួមមាន៖ ការអនុវត្តសាលាគ្មានទូរស័ព្ទ, ការពន្យារពេលការប្រើប្រាស់ស្មាតហ្វូនរហូតដល់កម្រិតវិទ្យាល័យ, ការរឹតបន្តឹងការចូលប្រើប្រាស់បណ្តាញសង្គមរហូតដល់អាយុ ១៦ ឆ្នាំ, និងការលើកទឹកចិត្តឱ្យកុមារមានឯករាជ្យភាពកាន់តែច្រើនក្នុងជីវិតពិត។

UNESCO ខ្លួនឯងក៏បានជំរុញឱ្យរដ្ឋាភិបាលនានារឹតបន្តឹងការប្រើប្រាស់ស្មាតហ្វូននៅក្នុងសាលារៀន ដើម្បីកាត់បន្ថយការរំខានក្នុងថ្នាក់ និងការពារកុមារពីហានិភ័យអនឡាញ ដូចជាការយាយីតាមប្រព័ន្ធអ៊ីនធឺណិត (cyberbullying)។ បណ្តាប្រទេសមួយចំនួននៅអឺរ៉ុប ដូចជា បារាំង ក្រិក ហុងគ្រី និងដាណឺម៉ាក ក៏បានដាក់ចេញនូវច្បាប់រឹតបន្តឹងការប្រើប្រាស់ទូរស័ព្ទនៅក្នុងបរិយាកាសអប់រំរួចមកហើយដែរ៕
https://www.nationthailand.com/blogs/news/asean/40052508