DOEB៖ ការហាមរបស់កម្ពុជាលើការនាំចូលប្រេងពីថៃ មិនមានផលប៉ះពាល់ខ្លាំងដល់ក្រុមហ៊ុនប្រេងទេ

DOEB៖ ការហាមរបស់កម្ពុជាលើការនាំចូលប្រេងពីថៃ មិនមានផលប៉ះពាល់ខ្លាំងដល់ក្រុមហ៊ុនប្រេងទេ

បាងកក៖ នាយកដ្ឋានពាណិជ្ជកម្មថាមពល (DOEB) បាននិយាយថា ការហាមប្រាមរបស់កម្ពុជាលើការនាំចូលប្រេងចម្រាញ់ពីប្រទេសថៃ មិនមានផលប៉ះពាល់ខ្លាំងដល់ក្រុមហ៊ុនប្រេងទេ ដោយសារក្រុមហ៊ុនទាំងនោះអាចកែសម្រួលការលក់ ដឹកជញ្ជូនផលិតផលរបស់ខ្លួនទៅកាន់ប្រទេសផ្សេងៗក្នុងអាស៊ី ក្រៅពីប្រទេសកម្ពុជា ។

កាសែតបាងកកប៉ុស្តិ៍ នៅថ្ងៃទី ២ ខែកក្កដានេះ ដោយស្រង់សំដីអគ្គនាយកក្រុមហ៊ុន DOEB លោក Sarawut Kaewtathip ឱ្យដឹងថា ក្រុមហ៊ុនថៃនាំចេញប្រេងជិត ៦លានលីត្រក្នុងមួយថ្ងៃមកកម្ពុជា អាចនឹងផ្លាស់ប្តូរទៅកាន់ប្រទេសផ្សេងទៀតដូចជាសិង្ហបុរីជាដើម។

ប្រទេសថៃមានរោងចក្រចម្រាញ់ប្រេងចំនួនប្រាំមួយ ជាមួយនឹងក្រុមហ៊ុន Thai Oil, IRPC និង PTT Global Chemical ស្ថិតនៅក្រោមក្រុមហ៊ុន PTT Group ខណៈដែលសាជីវកម្ម Bangchak និង Bangchak Sriracha ស្ថិតនៅក្រោមក្រុមហ៊ុន Bangchak Group ហើយក្រុមហ៊ុន Star Petroleum Refining គឺជាក្រុមហ៊ុនទីប្រាំមួយ។
រោងចក្រចម្រាញ់ប្រេងទាំង៦ ខាងលើនេះ ផលិតបានប្រេងចម្រាញ់សរុបជិត ១៦០ លានលីត្រក្នុងមួយថ្ងៃ ជាមួយនឹង ១៣០-១៣៥លានលីត្រក្នុងមួយថ្ងៃសម្រាប់លក់នៅក្នុងស្រុក។
លោក Sarawut ថ្លែងថា «វាមិនគួរមានបញ្ហាទេ ប្រសិនបើពួកគេលក់ផលិតផលដែលនៅសល់ទៅប្រទេសផ្សេងទៀត»។

សម្តេចនាយករដ្ឋមន្ត្រី ហ៊ុន ម៉ាណែត នៅពាក់កណ្តាលអធ្រាត្រ ថ្ងៃទី២២ ខែមិថុនាបានចេញសេចក្តីប្រកាសផ្អាកការនាំចូលប្រេង ដើម្បីឆ្លើយតបនឹងជម្លោះព្រំដែនកម្ពុជា-ថៃ។

ប្រេងទាំងអស់របស់កម្ពុជាត្រូវបាននាំចូលក្នុងបរិមាណជាមធ្យម ១០ លានលីត្រក្នុងមួយថ្ងៃ ខណៈប្រទេសថៃគឺជាអ្នកលក់ប្រេងចម្រាញ់ច្រើនជាងគេដល់កម្ពុជា។

បើតាមកាសែតបាងកកប៉ុស្តិ៍ តម្លៃដឹកជញ្ជូនប្រេងចម្រាញ់ពីប្រទេសថៃមកកម្ពុជាគឺមួយបាតក្នុងមួយលីត្រទាបជាងពីសិង្ហបុរីមកកម្ពុជា។ តម្លៃនេះក៏ទាបជាងការនាំចេញពីប្រទេសម៉ាឡេស៊ី និងវៀតណាមដែរ។ កម្ពុជាបាននិយាយមុននេះថា ខ្លួនគ្រោងនឹងទិញប្រេងបន្ថែមពីប្រទេសទាំងពីរនេះ។

រោងចក្រចម្រាញ់ប្រេងរបស់ថៃភាគច្រើនមានទីតាំងនៅច្រករបៀងសេដ្ឋកិច្ចភាគខាងកើត ដែលមិនឆ្ងាយពីប្រទេសកម្ពុជា។ ការហាមប្រាមប្រេងមានន័យថាកម្ពុជានឹងបាត់បង់ឱកាសទទួលបានអត្ថប្រយោជន៍ពីតម្លៃដឹកជញ្ជូនទាប។

មន្ត្រីបានកត់សម្គាល់ថា សម្រាប់ក្រុមហ៊ុនប្រេងថៃ ប្រសិនបើពួកគេមិននាំចេញប្រេងចម្រាញ់ទៅកាន់ប្រទេសផ្សេងទៀត ពួកគេអាចកាត់បន្ថយសមត្ថភាពផលិតកម្ម និងផ្លាស់ប្តូរទៅកម្មវិធីថែទាំសំខាន់ៗសម្រាប់គ្រឿងបរិក្ខារដែលមិនប្រើប្រាស់។
កាលពីឆ្នាំមុន ប្រទេសថៃបាននាំចេញប្រេងចំនួន ២,២៩ ពាន់លានលីត្រមកកម្ពុជា ដែលតំណាងឱ្យ ២១,១% នៃការនាំចេញប្រេងសរុប នេះបើតាមក្រសួងថាមពល។

ក្រុមហ៊ុន PTT Oil and Retail Business ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន PTT Group ដែលចុះក្នុងបញ្ជី SET បានមានប្រសាសន៍ថា ការហាមប្រាមរបស់កម្ពុជាលើការនាំចូលថាមពលពីប្រទេសថៃពីមុននឹងមិនប៉ះពាល់ដល់ពាណិជ្ជកម្មរបស់ខ្លួនតាមរយៈស្ថានីយ៍ប្រេងឥន្ធនៈចំនួន 186 នៅកម្ពុជានោះទេ។

ក្រុមហ៊ុនតាមរយៈក្រុមហ៊ុនបុត្រសម្ព័ន្ធរបស់ខ្លួន PTT Cambodia Ltd នឹងបន្តលក់បរិមាណប្រេងដែលនៅសល់នៅតាមស្ថានីយ៍នីមួយៗរហូតដល់វាត្រូវបានលក់អស់៕