កីឡាករវាយកូនបាល់លំដាប់ពិភពលោក Rafael Nadal ប្រកាសចូលនិវត្តន៍នៅចុងឆ្នាំនេះ

កីឡាករវាយកូនបាល់លំដាប់ពិភពលោក Rafael Nadal ប្រកាសចូលនិវត្តន៍នៅចុងឆ្នាំនេះ

កីឡាករវាយកូនបាល់សញ្ជាតិអេស្ប៉ាញ Rafael Nadal បានប្រកាសនៅថ្ងៃសុក្រនេះថា លោកនឹងចូលនិវត្តន៍ពីកីឡាវាយកូនបាល់អាជីព បន្ទាប់ពី តំណាងឱ្យប្រទេសរបស់គាត់ ក្នុងការប្រកួត Davis Cup នៅខែក្រោយ។

Rafael Nadal ដែលមានវ័យ ៣៨ឆ្នាំគឺជាអ្នកលេងកីឡាវាយកូនបាល់ដ៏អស្ចារ្យបំផុតមួយរូបនៅលើភពលោក ក្នុងចំណោមកីឡាករដ៏ល្បីដូចជា Roger Federer និង Novak Djokovic ។

Nadal បានឈ្នះពានរង្វាន់ Grand Slam ចំនួន២២ និងមេដាយមាសចំនួន២ ក្នុងអំឡុងពេលអាជីពដ៏អស្ចារ្យរបស់គាត់ ។

Nadal បាននិយាយក្នុងវីដេអូ ដែលបានបង្ហោះលើគណនី X របស់ខ្លួនថា ៖«ជំរាបសួរអ្នកទាំងអស់គ្នា ខ្ញុំមកនេះ ដើម្បីឱ្យអ្នកដឹងថា ខ្ញុំនឹងចូលនិវត្តន៍ពីកីឡាវាយកូនបាល់អាជីព។ វាច្បាស់ជាការសម្រេចចិត្តដ៏លំបាកមួយ ប៉ុន្តែនៅក្នុងជីវិតនេះ អ្វីៗទាំងអស់សុទ្ធតែមានការចាប់ផ្តើម និងចុងបញ្ចប់។ ហើយខ្ញុំគិតថា វាជាពេលវេលាដ៏សមស្របមួយដើម្បីបញ្ចប់អាជីព ដែលមានរយៈពេលយូរ និងជោគជ័យច្រើនជាងអ្វីដែលខ្ញុំរំពឹងទុក»។

បន្ទាប់ពីការប្រកាសរបស់ Nadal កីឡាករវាយកូនបាល់លេខមួយពិភពលោក Jannik Sinner បាននិយាយថា ការប្រកាសរបស់ Nadal គឺជាការសោកស្ដាយ ហើយថា ខ្លួនពិតជាសំណាងណាស់ ដែលបានស្គាល់រូបលោក ក្នុងកម្មវិធី Tour ដោយបន្ថែមថា ក្មេងជំនាន់ក្រោយ បានរៀនពីគុណតម្លៃរបស់ Nadal ។

គួរបញ្ជាក់ថា Nadal បានឈ្នះពាន French Open ១៤ដង, US Open ៤ដង, ឈ្នះ Australian Open ចំនួន ២ដង និង Wimbledon ២ដង ។ មិនតែប៉ុណ្ណោះ កីឡាករសញ្ជាតិអេស្ប៉ាញរូបនេះ បានឈ្នះមេដាយមាស ក្នុងឆ្នាំ ២០០៨ នៅទីក្រុងប៉េកាំង និងឆ្នាំ ២០១៦ នៅទីក្រុង Rio de Janeiro ៕