Gundogan ប្រកាសចូលនិវត្តន៍ពីក្រុមជម្រើសជាតិអាល្លឺម៉ង់

Gundogan ប្រកាសចូលនិវត្តន៍ពីក្រុមជម្រើសជាតិអាល្លឺម៉ង់

នៅថ្ងៃអង្គារ ទី២០ ខែសីហា ឆ្នាំ២០២៤នេះ ខ្សែបម្រើសញ្ជាតិអាល្លឺម៉ង់ Ilkay Gundogan បានសម្រេចចូលនិវត្តន៍ពីបាល់ទាត់អន្តរជាតិហើយ ក្នុងវ័យ ៣៣ឆ្នាំ។ នេះបើតាមការប្រកាសរបស់កីឡាកររូបនេះ។

កីឡាករ Gundogan ដែលបានចូលរួមជាមួយក្លិបអ្នកមានបុណ្យ Barcelona ពីក្លិបមេឃខៀវ Manchester City កាលពីឆ្នាំមុន បានបង្ហាញខ្លួនជាលើកដំបូង សម្រាប់ប្រទេសអាឡឺម៉ង់ ក្នុងឆ្នាំ ២០១១ និងស៊ុតបញ្ចូលទីបាន ១៩ គ្រាប់ ក្នុងការបង្ហាញខ្លួន 82លើក សម្រាប់ក្រុមជម្រើសជាតិ។

Gundogan បានបង្ហោះនៅលើបណ្តាញសង្គមថា ៖«បន្ទាប់ពីការពិចារណាពីរបីសប្តាហ៍ ខ្ញុំបានសន្និដ្ឋានថា វាដល់ពេលដែលត្រូវបញ្ចប់អាជីពជាជម្រើសជាតិរបស់ខ្ញុំ។ ខ្ញុំក្រឡេកមើលទៅក្រោយ ដោយមានមោទនភាពយ៉ាងខ្លាំង ចំពោះការប្រកួតអន្តរជាតិចំនួន ៨២លើក សម្រាប់ប្រទេសកំណើតរបស់ខ្ញុំ ដែលជាចំនួនដែលខ្ញុំមិននឹកស្មានដល់នៅពេលដែលខ្ញុំបានបង្ហាញខ្លួនជាលើកដំបូងសម្រាប់ក្រុមជម្រើសជាតិ ក្នុងឆ្នាំ ២០១១»។

គួរបញ្ជាក់ថា Gundogan បានបង្ហាញខ្លួនក្នុងការប្រកួតទាំង៥ សម្រាប់ប្រទេសអាឡឺម៉ង់ នៅ Euro 2024 ហើយការបង្ហាញខ្លួនជាអន្តរជាតិចុងក្រោយរបស់គាត់ គឺនៅក្នុងការបរាជ័យក្នុងវគ្គ 1/4 ចុងក្រោយរបស់ពួកគេ ទៅលើក្រុមអេស្ប៉ាញ៕