ក្រុមហ៊ុនឯកជនជប៉ុន ប្ដេជ្ញាចូលរួមបង្កើតការងារជូនពលរដ្ឋកម្ពុជាឱ្យកាន់តែច្រើន ដើម្បីជំរុញសេដ្ឋកិច្ចជាតិ
![ក្រុមហ៊ុនឯកជនជប៉ុន ប្ដេជ្ញាចូលរួមបង្កើតការងារជូនពលរដ្ឋកម្ពុជាឱ្យកាន់តែច្រើន ដើម្បីជំរុញសេដ្ឋកិច្ចជាតិ](https://ennasia.com/wp-content/uploads/2023/09/Thumbnail-For-Webside-final-14-09-2023-114.jpg)
ក្រុមហ៊ុនដេនសូ (Denso) របស់ជប៉ុនដែលកំពុងមានប្រតិបត្តិការយ៉ាងសកម្មនៅក្នុងតំបន់សេដ្ឋកិច្ចពិសេស រ៉ូ យ៉ាល់ គ្រុប របស់មហាសេដ្ឋី អ្នកឧកញ៉ា គិត ម៉េង ជាមួួនឹងការផ្តល់ឱកាសការងាររហូតដល់ប្រមាណ ៦០០នាក់។
នៅក្នុងឱកាសបានចូលជួបសម្ដែងការគួរសម និងពិភាក្សាការងារជាមួយឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗនេះ ក្រុមហ៊ុនដេនសូ (Denso) បានប្ដេជ្ញាចូល រួមបង្កើតការងារជូនពលរដ្ឋកម្ពុជាឱ្យបានកាន់តែច្រើន។
ជាកិច្ចចាប់ផ្តើម ឯកឧត្តមអគ្គលេខាធិការ ជា វុទ្ធី បានសម្ដែងនូវកាស្វាគមន៍ និងគាំទ្រដល់ក្រុមហ៊ុនជប៉ុនមួយនេះ ដែលមានសកម្មភាពវិនិយោគនៅព្រះរាជាណាចក្រកម្ពុជាតាំងពីឆ្នាំ២០១៣។
លោក ម៉ាសាអូ ស៊ីអ ម៉ាស៊ី អនុប្រធានជាន់ខ្ពស់នៃក្រុមហ៊ុនដេនសូ បានជម្រាបជូនឯកឧត្តមអគ្គលេខាធិការថា ចាប់តាំងពីបើករោងចក្រនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នៅឆ្នាំ២០១៣ មកដល់បច្ចុប្បន្ន មានកម្មករប្រមាណ៦០០នាក់បានកំពុងបម្រើការនៅរោងចក្ររបស់លោក។
ដើម្បីចូលរួមជំរុញកំណើនសេដ្ឋកិច្ចនៅកម្ពុជា ក្រុមហ៊ុននឹងមានគម្រោងបង្កើតឱកាសការងាររបន្ថែមទៀតក្នុងពេលអនាគតដ៍ខ្លីខាងមុខដែល អាចរំពឹងទុកថានឹងកើនដល់ប្រមាណ ១.០០០នាក់ ជាមួយនឹងផលិតផលរបស់ខ្លួនចំនួន៥មុខដូចជា៖ ម៉ាញ៉េតូ (Magneto) ឧបករណ៍សម្រាប់បន្ថយកំដៅក្នុងម៉ាស៊ីនឡាន (Tube/Inner Fin_for_ Inter Cooler) ឧបករណ៍វាស់កម្រិតទឹកនៅក្នុងម៉ាស៊ីនឡានម៉ាស៊ូត (Level Switch for Diesel filter) ឧបករណ៍បញ្ចុះកំដៅប្រេងនៅក្នុងម៉ាស៊ីន (SUS Oil Cooler) និងកញ្ច្រែងទឹកក្ដៅ (ចាប់ពីឆ្នាំ២០២២) (Radiator)។
ក្រៅតែពីការបង្កើតការងារធ្វើជូនដល់ពលរដ្ឋកម្ពុជា អ្នកតំណាងរូបនេះក៍បានគូសបញ្ជាក់បន្ថែមថា ក្រោមកម្មវិធីអភិវឌ្ឍន៍ធនធានមនុស្សដែល មានឈ្មោះថា DENSO in Industrial Talent Development ចាប់ពីឆ្នាំ២០១៦-២០២២ ក្រុមហ៊ុនបាន បណ្តុះបណ្តាលធនធានមនុស្សប្រមាណ ២២០នាក់ ហើយក្រុមហ៊ុនក៏នឹងមានគម្រោងធ្វើការបណ្តុះបណ្តាលប្រមាណ ៦០នាក់បន្ថែមទៀតក្នងឆ្នាំ២០២៣ និង៧០នាក់នៅឆ្នាំ២០២៤។
ក្នុងឱកាសនោះ ឯកឧត្តមអគ្គលេខាធិការ ជា វុទ្ធី បានសម្តែងនូវការអបអរសាទរចំពោះការរីកចំរើនរបស់ក្រុហ៊ុនដែលឈាន ទៅដល់គម្រោងពង្រីករោងចក្រ ជាពិសេសការបណ្តុះបណ្តាលធនធានមនុស្សកម្ពុជាដើម្បីបង្កើនផលិតភាពរបស់ក្រុមហ៊ុន៕