ឯកឧត្តម ស ថេត ដឹកនាំកិច្ចប្រជុំស្ដីពីការផ្សព្វផ្សាយផែនការការពារនាឱកាសបុណ្យចូលឆ្នាំថ្មីប្រពៃណីខ្មែរ
ឯកឧត្តម ស ថេត ដឹកនាំកិច្ចប្រជុំស្ដីពីការផ្សព្វផ្សាយផែនការការពារនាឱកាសបុណ្យចូលឆ្នាំថ្មីប្រពៃណីខ្មែរ
ភ្នំពេញ ៖ នៅស្នងការដ្ឋាននគរបាលរាជធានីភ្នំពេញ នៅរសៀលថ្ងៃសុក្រទី០៧ ខែមេសា ឆ្នាំ២០២៣ បានបើកកិច្ចប្រជុំក្រោមអធិតីភាពរបស់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញដឹកនាំកិច្ចប្រជុំស្តីពីការផ្សព្វផ្សាយផែនការការពារនាឱកាសបុណ្យចូលឆ្នាំថ្មីប្រពៃណីខ្មែរដែលនឹងចូលមកដល់នាពេលឆាប់ៗខាងមុខនេះ ក៏ដូចជាផែនការការពារការប្រកួតកីឡា ស៊ីហ្គេមលើកទី៣២ និងប៉ារ៉ាស៊ីហ្គេមលើកទី១២ ដែលព្រះរាជាណាចក្រកម្ពុជាធ្វើជាម្ចាស់ផ្ទះ។
ក្នុងកិច្ចប្រជុំនេះដែរ ក៏មានការចូលរួមពីលោក លោកស្រីស្នងការរងទទួលដឹកនាំផែនការងារជំនាញទាំង១៣ ជំនួយការស្នងការ នាយការិយាល័យពាក់ព័ន្ធ លោកអធិការនគរបាលខណ្ឌទាំង១៤ លោកនាយ នាយរងការិយាល័យ នាយ នាយរងផ្នែក និងប្រធានគោលដៅចរាចរណ៍ទាំងអស់ក្នុងភូមិសាស្ត្ររាជធានីភ្នំពេញ ក៏ដូចជាមន្ត្រីពាក់ព័ន្ធមួយចំនួនទៀតផងដែរ ។
ក្នុងឱកាសបុណ្យចូលឆ្នាំថ្មីប្រពៃណីខ្មែរខាងមុខនេះ ឯកឧត្តមស្នងការ បានណែនាំដល់លោក លោកស្រីស្នងការរង និងសមាជិកនៃអង្គប្រជុំ ឲ្យយកចិត្តទុកដាក់ខ្ពស់លើការសម្រួលចរាចរណ៍ទាំងក្នុងក្រុង គ្រប់ច្រកចេញចូលក្រុង ទីវត្តអារាម កន្លែងកំសាន្ត ជាពិសេសកម្លាំងជំនាញត្រូវតែរៀបចំកម្លាំងល្បាតជាប្រចាំដើម្បីបង្ការ ទប់ស្កាត់ និងបង្ក្រាបបទល្មើស កុំឲ្យកើតមានឡើង ។
ជាមួយនោះដែរឯកឧត្តម ក៏បានណែនាំដល់មន្ត្រីចរាចរណ៍ទាំងអស់ ត្រូវបង្ហាញនូវកាយវិការ ពាក្យសំដីឲ្យបានសមរម្យ ជាពិសេសបង្ហាញនូវទឹកមុខរីករាយ នៅពេលចុះជួយសម្រួលចរាចរណ៍ជូនប្រជាពលរដ្ឋ។ ក្រៅពីនោះ កម្លាំងអន្តរាគមន៍ កម្លាំងអគ្គីភ័យ ត្រូវតែប្រចាំការជាប្រចាំ ២៤ម៉/២៤ម៉ ដើម្បីត្រៀមអន្តរាគមន៍ ឬសង្គ្រោះឲ្យបានទាន់ពេលវេលានៅពេលមានករណីអគ្គីភ័យ ឬករណីបទល្មើសផ្សេងៗកើតមានឡើង ។
ចំពោះផែនការការពារការប្រកួត ស៊ីហ្គេមលើកទី៣២ និងប៉ារ៉ ហ្គេមលើកទី១២ លោក លោកស្រីស្នងការរង និងកម្លាំងពាក់ព័ន្ធ ត្រូវតែមានទទួលខុសត្រូវខ្ពស់ ក្នុងការបំពេញតួនាទីភារកិច្ច តាមផែនការដែលបានកំណត់ ។ នៅក្នុងផែនការ គឺមានការបែកចែកការការពារតាមគ្រប់គោលដៅ ប្រកួត គោលដៅស្នាក់ គោលដៅកន្លែងកំសាន្ត ដែលគណប្រតិភូ និងកីឡាករ ស្នាក់នៅ ឬទៅលេងកំសាន្ត ។ កម្លាំងពាក់ព័ន្ធត្រូវតែចេញល្បាត ជាប្រចាំ ដេីម្បីចូលរួមក្នុងការបង្ការ ទប់ស្កាត់ កុំឲ្យបទល្មើសកើតមានឡើង។ ម្យ៉ាងវិញទៀត កម្លាំងអន្តរាគមន៍ និងកម្លាំងអគ្គិភ័យ ត្រៀមជាប្រចាំ ដើម្បីចេញអន្តរាគមន៍ និងសង្គ្រោះឲ្យបានទាន់ពេលវេលា ។ ជាពិសេសដោយមានគណប្រតិភូ កីឡាករ កីឡាការនី និងអ្នកមកចូលទស្សនាច្រើន ដូច្នេះកម្លាំងចរាចរណ៍ និងសណ្តាប់ធ្នាប់មត្រូវយកចិត្តទុកដាក់ខ្ពស់ក្នុងការជួយសម្រួលចរាចរណ៍ ធ្វើសណ្តាប់ធ្នាប់តាមដងផ្លូវ តាមកន្លែងកំសាន្ត ដើម្បីកុំឲ្យមានការកកស្ទះ ។ ជាមួយនោះដែរ ឯកឧត្តមស្នងការ ក៏បានណែនាំឲ្យយកចិត្តទុកដាក់ និងរៀបចំផែនការ ការពារសម្រាប់ត្រៀមទុកជាមុនសម្រាប់ធានាការពារឲ្យបាននូវសន្តិសុខ សុវត្ថិភាព សណ្តាប់ធ្នាប់ ឲ្យបានល្អ ក្នុងពេលឃោសនា ពេលបោះឆ្នោត ពេលរាប់សន្លឹកឆ្នោត និងពេលប្រកាសលទ្ធផលនៃការបោះឆ្នោត ។
មុននឹងបញ្ចប់ ឯកឧត្តមស្នងការបានណែនាំដល់គ្រប់អង្គភាពទាំងអស់ចំណុះស្នងការដ្ឋាននគរបាលរាជធានីភ្នំពេញ ត្រូវតែរៀបចំប្រជុំជួរគោរពទង់ជាតិជាប្រចាំរៀងរាល់ដើមសប្តាហ៍ ដោយច្រៀងបទភ្លេងជាតិដោយផ្ទាល់មាត់ ហាមចាក់ភ្លេង ។ ជាកិច្ចបញ្ចប់ឯកឧត្តមស្នងការ បានធ្វើការកោតសរសើរដល់កងកម្លាំងទាំងអស់ នាពេលកន្លងមលដែលបានលះបង់ ខិតខំបំពេញតួនាទីភារកិច្ច បម្រើប្រជាពលរដ្ឋ ការពារថ្នាក់ដឹកនាំជាតិ អន្តរជាតិ ធានាបាននូវសន្តិសុខ សណ្តាប់ធ្នាប់ល្អ ក្នុងកិច្ចប្រជុំធំៗជាច្រើនដោយទទួលបានជោគជ័យដ៏ត្រចះត្រចង់ ។
