អត្តពលិកកម្ពុជា ១៨ប្រភេទកីឡា ចាប់ផ្ដើមប្រមូលផ្ដុំ ត្រៀមកីឡាយុវជនអាស៊ី ចុងខែតុលា

អត្តពលិកកម្ពុជា ១៨ប្រភេទកីឡា ចាប់ផ្ដើមប្រមូលផ្ដុំ ត្រៀមកីឡាយុវជនអាស៊ី ចុងខែតុលា

ក្រុមអត្តពលិកថ្នាលពីចន្លោះអាយុ ១៤ឆ្នាំ ដល់១៧ឆ្នាំ មកពី ១៨ប្រភេទកីឡា ដែលត្រូវចូលរួមប្រកួតព្រឹត្តិការណ៍កីឡាយុវជនអាស៊ី ឆ្នាំ២០២៥ នៅប្រទេសបារ៉ែន បានចាប់ផ្ដើមការប្រមូលផ្ដុំហ្វឹកហាត់ហើយ ចាប់ពីថ្ងៃទី០១ ខែមេសា ម្សិលមិញនេះ រហូតដល់ចប់ការប្រកួតចុងខែតុលា ឆ្នាំ២០២៥។

ឯកឧត្ដម វ៉ាត់ ចំរើន ប្រធានគណៈកម្មការជ្រើសរើសអត្តពលិកជម្រើសជាតិ បានមានប្រសាសន៍ថា “៖ អ្វីដែលគណៈកម្មការត្រូវធ្វើ គឺត្រូវខិតខំប្រឹងប្រែងជាមួយសហព័ន្ធជ្រើសរើសកីឡាករកីឡាការិនីមានទេពកោសល្យ កម្រិតបច្ចេកទេស និងគុណផលកីឡាខ្ពស់ឱ្យបានល្អ ជ្រើសរើសគ្រូបង្វឹកមានស្នាដៃ បទពិសោធ លក្ខខណ្ឌពេលវេលា និងគ្រូដែលមានស្នាដៃល្អ ដែលអាចបណ្ដុះបណ្ដាលកីឡាករបានល្អ។

ទាំងគ្រូទាំងកីឡាករយើងត្រូវមើលឱ្យបានគ្រប់ជ្រុងជ្រោយទៅលើលក្ខខណ្ឌវិនិច្ឆ័យនៃការជ្រើសរើស ដើម្បីកុំឱ្យមានការជ្រើសរើសមិនបានត្រឹមត្រូវ មិនបានគិតពីទេពកោសល្យពិតប្រាកដរបស់កីឡាករ និងគ្រូបង្វឹកដែលធ្វើឱ្យប៉ះពាល់គុណផលកីឡា។ យើងបានសម្រេចជាស្ថាពរជ្រើសរើសយុវជនថ្នាល និងគ្រូបង្វឹករួចហើយ។ យើងបានខិតខំប្រឹងប្រែងស្វែងរកការបណ្ដុះបណ្ដាល ការជំរុញ ការតាមដានត្រួតពិនិត្យពីមជ្ឈមណ្ឌលហ្វឹកហ្វឺន និងក្រសួង ធ្វើយ៉ាងណាឱ្យដំណើរការហ្វឹកហាត់មានការត្រួតពិនិត្យ និងវាយតម្លៃលទ្ធផលបានល្អតាមវិទ្យាសាស្ត្រកីឡាយ៉ាងត្រឹមត្រូវ។”

សម្រាប់ប្រភេទកីឡា ដែលកម្ពុជា នឹងបញ្ជូនឱ្យទៅចូលរួមនោះមាន ១៨ប្រភេទកីឡា ដោយក្នុងនោះ មានកីឡា Aquatics(បាល់ទះលើទឹក) , អត្តពលិកកម្ម, វាយសី, បាល់បោះ, Equestrian(កីឡាជិះសេះ), យូដូ, Jiu-Jitsu, MMA, ប្រណាំងកង់, វាយកូនឃ្លីលើតុ, តេក្វាន់ដូ, ទ្រីយ៉ាត្លុង, ចំបាប់, លើកទម្ងន់, បាល់ទះ, បាល់ទាត់លើតុ, Muay, និងប្រដាល់សកល។

គួរបញ្ជាក់ថា ព្រឹត្តិការណ៍កីឡាយុវជនអាស៊ី ឆ្នាំ២០២៥ ដែលប្រទេសបារ៉ែនទទួលធ្វើជាម្ចាស់ផ្ទះ នឹងប្រព្រឹត្តទៅពីថ្ងៃទី២២ដល់ថ្ងៃទី៣១ ខែតុលា មាន២១ប្រភេទកីឡា។ បន្ទាប់ពីចប់ព្រឹត្តិការណ៍ឆ្នាំ២០២៥ ព្រះរាជាណាចក្រកម្ពុជា នឹងទទួលភារៈធ្វើជាម្ចាស់ផ្ទះបន្តពីប្រទេសបារ៉ែន៕