ត្រៀមជិះហើយឬនៅបងប្អូន ! ក្រុមហ៊ុនអាកាសចរណ៍ AirAsia Cambodia បើកសម្ពោធជាផ្លូវការហើយ

ត្រៀមជិះហើយឬនៅបងប្អូន ! ក្រុមហ៊ុនអាកាសចរណ៍ AirAsia Cambodia បើកសម្ពោធជាផ្លូវការហើយ

ភ្នំពេញ៖ ក្រុមហ៊ុនអាកាសចរណ៍ AirAsia Cambodia បានបើកសម្ពោធជាផ្លូវការ ក្រោមអធិបតីភាព ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងវត្តមានរបស់គណៈគ្រប់គ្រងនៃក្រុមហ៊ុនCambodia Airports ដែលជាក្រុមហ៊ុនអភិវឌ្ឍន៍ និងប្រតិបត្តិករអាកាសយានដ្ឋាន និងជាក្រុមហ៊ុនបុត្រសម្ព័នរបស់ក្រុមហ៊ុនVinci Airports។

ការបើកដំណើរការជាផ្លូវការនេះ ធ្វើឡើងនៅថ្ងៃទី ១ ខែឧសភា ឆ្នាំ ២០២៤ គឺជាព្រឹត្តិការណ៍ដ៏សំខាន់មួយនៅក្នុងឧស្សាហកម្មអាកាសចរណ៍របស់ប្រទេស ដោយបង្ហាញថានឹងមានការភ្ជាប់ទំនាក់ទំនង និងជំរុញទេសចរណ៍កាន់តែច្រើន។

ក្រោយសម្ពោធដាក់ឱ្យដំណើការនេះ ក្រុមហ៊ុនអាកាសចរណ៍កម្ពុជា AirAsiaនេះ នឹងចាប់ផ្តើមប្រតិបត្តិការជើងហោះហើរក្នុងស្រុកប្រចាំថ្ងៃនៅថ្ងៃទី ២ ខែឧសភា ឆ្នាំ ២០២៤ នេះដោយសារក្រុមហ៊ុនអាកាសចរណ៍តម្លៃទាបនេះមានគោលបំណងជំរុញការធ្វើដំណើរតាមផ្លូវអាកាសនៅក្នុងប្រទេសអាស៊ីអាគ្នេយ៍មួយនេះ។

ក្រុមហ៊ុនអាកាសចរណ៍នេះនឹងចាប់ផ្តើមជាមួយនឹងទិសដៅហោះហើរក្នុងស្រុកចំនួនបីគឺ ភ្នំពេញ សៀមរាប និងព្រះសីហនុ ដោយប្រើប្រាស់យន្តហោះ A320 ចំនួនពីរដែលមានមូលដ្ឋាននៅអាកាសយានដ្ឋានអន្តរជាតិភ្នំពេញ។

នាយកប្រតិបត្តិក្រុមហ៊ុន AirAsia Cambodia លោក វីសុទ្ធ ណាម (Vissoth Nam) មានប្រសាសន៍ថា ការធ្វើបែបនេះនឹងមិនត្រឹមតែធ្វើឱ្យការតភ្ជាប់កាន់តែប្រសើរឡើងប៉ុណ្ណោះទេ ប៉ុន្តែថែមទាំងលើកទឹកចិត្តអ្នកធ្វើដំណើរឱ្យស្នាក់នៅក្នុងប្រទេសកម្ពុជាបានយូរទៀតផង។

លោកបានមានប្រសាសន៍ទៀតថា «ចក្ខុវិស័យរបស់យើងគឺផ្លាស់ប្តូររបៀបដែលប្រជាជនធ្វើដំណើរក្នុងប្រទេសកម្ពុជា និងធ្វើឱ្យការធ្វើដំណើរតាមផ្លូវអាកាសក្លាយជាផ្នែកសំខាន់មួយនៃបណ្តាញដឹកជញ្ជូនរបស់ប្រទេស»។ «ថ្លៃសំបុត្រធ្វើដំណើរគឺទាបត្រឹមតែ ៤៩ ដុល្លារអាមេរិក ក្នុងមធ្យោបាយមួយទៅកាន់គោលដៅក្នុងស្រុកដ៏អស្ចារ្យ ដូច្នេះភ្ញៀវជាតិ និងអន្តរជាតិកាន់តែច្រើនអាចទទួលបានបទពិសោធន៍ដ៏អស្ចារ្យនៃប្រទេសកម្ពុជាតាមយន្តហោះក្នុងតម្លៃសមរម្យ។

លោកមានជំនឿថា ក្រុមហ៊ុនអាកាសចរណ៍នឹងចូលរួមលើកស្ទួយសេដ្ឋកិច្ចក្នុងតំបន់ដោយផ្តល់ការងារដល់ប្រជាជនក្នុងស្រុក និងគាំទ្រដល់ការអភិវឌ្ឍទេសចរណ៍៕