កម្ពុជា-កូរ៉េ សហការគ្នាក្នុងការពង្រឹងចរាចរណ៍នៅជុំវិញសាលារៀន ដើម្បីសុវត្ថិភាពសិស្ស

កម្ពុជា-កូរ៉េ សហការគ្នាក្នុងការពង្រឹងចរាចរណ៍នៅជុំវិញសាលារៀន ដើម្បីសុវត្ថិភាពសិស្ស

នាថ្ងៃទី ២១ សីហាកន្លងទៅថ្មីៗនេះ កម្ពុជា-កូរ៉េ បានចុះ​អនុស្សរណៈយោគយល់គ្នាស្ដីពី “ការពង្រឹងសុវត្ថិ​ភាពចរាចរណ៍ និងការកែលម្អបរិក្ខារសុវត្ថិភាព នៅតំបន់សាលារៀនក្នុង​ប្រទេសកម្ពុជា”។

ការចុះអនុស្សរណៈយោគយល់គ្នាខាងលើនេះធ្វើឡើងដោយមានការចូលរួមពី ភាគីកម្ពុជា​តាមរយៈអគ្គលេ​ខាធិការដ្ឋាន​​នៃគណៈ​កម្មាធិការជាតិសុវត្ថិភាពចរាចរណ៍ផ្លូវគោក ដឹកនាំដោយ​លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន ព្រមទាំងភាគីកូរ៉េ តាមរយៈមជ្ឈមណ្ឌលស្រាវជ្រាវផ្នែកដឹកជញ្ជូន និងការរួមបញ្ចូលទំនាក់ទំនងព័ត៌មានវិទ្យា នៃសកល​វិទ្យាល័យជាតិដឹកជញ្ជូនកូរ៉េ។

តាមរយៈការចុះអនុស្សរណៈនៃការយោគយល់គ្នាខាងលើនេះ នឹងផ្ដល់ឱកាសដល់ភាគីកូរ៉េ និងភាគីកម្ពុជា អាចមានមូលដ្ឋានគ្រឹះក្នុងការរៀបចំឯកសារសំណើគម្រោង​ពង្រឹងសុវត្ថិភាព​ចរាចរណ៍ និងការ​កែលម្អបរិក្ខារសុវត្ថិភាពនៅតាមតំបន់សាលារៀនក្នុងប្រទេសកម្ពុជា ដើម្បីស្នើសុំការ​គាំទ្រជា​ជំនួយពីរដ្ឋាភិបាលកូរ៉េ។

គម្រោងនេះនឹងផ្ដោតលើការបណ្ដុះបណ្ដាលកុមារ ការលើកកម្ពស់ការយល់ដឹងអំពីសុវត្ថិ​ភាព​ចរាចរណ៍ជូនប្រជាពលរដ្ឋខ្មែរ តាមរយៈការបង្កើតឱ្យមាននូវមជ្ឈមណ្ឌលអប់រំសុវត្ថិភាពចរាចរណ៍ ការបង្កើតឱ្យមានតំបន់សាលារៀន (Safe School Zone) និងការរៀបចំឱ្យមានក្រុមការងារស្ម័គ្រ​ចិត្តចុះជួយលើការងារសុវត្ថិភាពចរាចរណ៍ផ្លូវគោកជាដើម។

ក្រោយការចុះអនុស្សរណៈនៃការយោគយល់គ្នាលើគម្រោងខាងលើ ភាគីកូរ៉េរំពឹងថានឹងអាចចូលរួម​ចំណែកកាត់បន្ថយគ្រោះថ្នាក់ចរាចរណ៍ចំពោះកុមារក្នុងប្រទេសកម្ពុជា ដែលជាផ្នែកមួយក្នុងការលើក ស្ទួយវិស័យអប់រំ និងពង្រឹងធនធានមនុស្សផងដែរ៕