ក្រសួងទេសចរណ៍ដាក់ឱ្យដំណេីរការប្រពន្ធ័អនឡាញស្នេីសុំបញ្ជាក់គុណភាពសេវាកម្មទេសចរណ៍

ក្រសួងទេសចរណ៍ដាក់ឱ្យដំណេីរការប្រពន្ធ័អនឡាញស្នេីសុំបញ្ជាក់គុណភាពសេវាកម្មទេសចរណ៍

ភ្នំពេញ : ដើម្បីពង្រឹងគុណភាពសេវាកម្មទេសចរណ៍ត្រៀមទទួលភ្ញៀវទេសចរចិន ក្រោយវិបត្តិកូវិដ-១៩ និងលើកស្ទួយឧស្សាហកម្មទេសចរណ៍កម្ពុជាសម្រាប់ទីផ្សារចិន ក្រសួងទេសចរណ៍បានរៀបចំ និងដាក់ឲ្យដំណើរការប្រព័ន្ធស្នើសុំបញ្ជាក់គុណភាពសេវាកម្មទេសចរណ៍ត្រៀមទទួលភ្ញៀវទេសចរចិនតាមប្រព័ន្ធអនឡាញ ស្របទៅតាមសៀវភៅស China Ready សម្រាប់ឧស្សាហកម្មទេសចរណ៍កម្ពុជា និងស្តង់ដារវាយតម្លៃ និងបញ្ជាក់គុណភាពនិងទទួលស្គាល់សេវាកម្មទេសចរណ៍ត្រៀមទទួលភ្ញៀវទេសចរចិន។

ប្រព័ន្ធនេះនឹងផ្តល់ភាពងាយស្រួលដល់អាជីវកម្មទេសចរណ៍ដាក់ពាក្យស្នើសុំការចុះវាយតម្លៃ និងបញ្ជាក់គុណភាពសេវាកម្មរបស់ខ្លួនឱ្យកាន់តែឆាប់រហ័ស ចំណេញពេលវេលា។ ការទទួលបានការបញ្ជាក់គុណភាពសេវាកម្មទេសចរណ៍ នេះ ប្រតិបត្តិករនឹងទទួលបានអត្ថប្រយោជន៍សំខាន់ៗដូចជា៖

១. ទទួលបានឡាបែលបញ្ជាក់​គុណភាព (China Ready Accredited)

២.បង្ហាញថាសេវាកម្មរបស់ខ្លួនមានគុណភាពស្របតាមសៀវភៅស China Ready និងមានការទទួលស្គាល់ដោយក្រសួងទេសចរណ៍

៣.ប្រតិបត្តិករទេសចរណ៍ចិន-ភ្ញៀវទេសចរចិនមានទំនុកចិត្តដល់អាជីវកម្មរបស់ខ្លួន

៤.ចូលក្នុងបណ្តាញក្រុមហ៊ុនទេសចរណ៍ទទួលបាន CRA និងផ្សព្វផ្សាយដល់ទីផ្សារចិន ។

សូមជម្រាបថា សេវាកម្មទេសចរណ៍ដែលអាចដាក់ពាក្យស្នើសុំបញ្ជាក់គុណភាពសេវាកម្មទេសចរណ៍ត្រៀមទទួលភ្ញៀវទេសចរចិនមានដូចជា ៖ សេវាកម្មសណ្ឋាគារ និងស្នាក់នៅ, សេវាកម្មម្ហូបអាហារ និងភេសជ្ជៈ, សេវាកម្មដឹកជញ្ជូនទេសចរណ៍, រមណីយដ្ឋានទេសចរណ៍, ផ្សារទំនើបនឹងហាងលក់វត្ថុអនុស្សាវរីយ៍, សេវាកម្មកម្សាន្ត និងការីទេសចរណ៍-ភ្នាក់ងារទេសចរណ៍។

ក្រសួងទេសចរណ៍សង្ឈឹមថា ម្ចាស់អាជីវកម្មទេសចរណ៍ដែលទទួលទេសចរចិនទាំងអស់ចូលរួមពង្រឹងគុណភាពសេវាកម្មរបស់ខ្លួនត្រៀមទទួលភ្ញៀវចិន និងដាក់ពាក្យស្នើសុំបញ្ជាក់​គុណភាព​សេវាកម្ម​តាមរយៈវែបសាយ​ http://cambodia-chinaready.com។