អ៊ីរ៉ង់ថា សំណើសន្តិភាពរបស់អាមេរិក “ហួសហេតុ និងមិនសមហេតុផល” ខណៈបដិសេធការចរចាថ្មី

ដោយ៖ Chhan Sreyka | 3 ម៉ោងមុន ព័ត៌មានអន្តរជាតិ

តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ Esmail Baghaei បាននិយាយថា សំណើដែល United States បញ្ជូនទៅកាន់ទីក្រុង Tehran គឺ “ហួសហេតុ និងមិនសមហេតុផល” ហើយអ៊ីរ៉ង់បានបដិសេធម្តងទៀតចំពោះការចរចាណាមួយជាមួយទីក្រុងវ៉ាស៊ីនតោន។

លោក Baghaei បានបញ្ជាក់ថា សំណើរបស់អាមេរិកមិនគោរពដល់ផលប្រយោជន៍ជាតិ និងសិទ្ធិអធិបតេយ្យភាពរបស់អ៊ីរ៉ង់ឡើយ ហើយការចរចាមិនអាចធ្វើឡើងបាន ប្រសិនបើសំណើនៅតែមានលក្ខខណ្ឌដែលអ៊ីរ៉ង់ចាត់ទុកថាមិនសមហេតុផល។

សំណើររបស់អាមេរិកមានអ្វីខ្លះ

តាមរបាយការណ៍ប្រព័ន្ធផ្សព្វផ្សាយអន្តរជាតិ អាមេរិកបានដាក់សំណើ ផែនការសន្តិភាពប្រហែល ១៥ ចំណុច ដើម្បីបញ្ចប់សង្គ្រាម និងបន្ថយភាពតានតឹងនៅមជ្ឈិមបូព៌ា ដែលត្រូវបានបញ្ជូនទៅអ៊ីរ៉ង់តាមរយៈអ្នកសម្របសម្រួលពីប៉ាគីស្ថាន។

ចំណុចសំខាន់ៗក្នុងសំណើនោះរួមមាន៖
• អ៊ីរ៉ង់ត្រូវ បញ្ឈប់កម្មវិធីបង្កើនសារធាតុអ៊ុយរ៉ាញ៉ូម និងកាត់បន្ថយកម្មវិធីនុយក្លេអ៊ែរ។
• បិទ ឬរុះរើមូលដ្ឋាននុយក្លេអ៊ែរសំខាន់ៗ និងអនុញ្ញាតឱ្យមានការត្រួតពិនិត្យពីទីភ្នាក់ងារអន្តរជាតិ។
• កំណត់ ឬបញ្ឈប់កម្មវិធីមីស៊ីលបាលីស្ទិក របស់អ៊ីរ៉ង់។
• បញ្ឈប់ការគាំទ្រក្រុមប្រដាប់អាវុធនៅតំបន់មជ្ឈិមបូព៌ា ដែលអាមេរិកចាត់ទុកថាជាក្រុមប្រយុទ្ធជំនួស។
• បើកឡើងវិញច្រកសមុទ្រ Hormuz សម្រាប់ការដឹកជញ្ជូនប្រេង និងពាណិជ្ជកម្មអន្តរជាតិ។
• ជំនួសវិញ អាមេរិកអាចពិចារណា បន្ធូរទណ្ឌកម្មសេដ្ឋកិច្ច និងកិច្ចសហប្រតិបត្តិការថាមពលស៊ីវិល។

ទោះជាយ៉ាងណា អ៊ីរ៉ង់បានចាត់ទុកសំណើនេះថា មានលក្ខខណ្ឌច្រើនពេក និងមិនមានការធានាច្បាស់លាស់អំពីការលុបទណ្ឌកម្មសេដ្ឋកិច្ច។

ភាពតានតឹងរវាងអ៊ីរ៉ង់ និងសហរដ្ឋអាមេរិកបានកើនឡើងយ៉ាងខ្លាំង បន្ទាប់ពីការវាយប្រហារយោធា និងការប្រយុទ្ធនៅតំបន់មជ្ឈិមបូព៌ាក្នុងឆ្នាំ២០២៦ ដែលពាក់ព័ន្ធនឹង Iran Israel និងសម្ព័ន្ធមិត្តរបស់សហរដ្ឋអាមេរិក។

ក្នុងពេលដូចគ្នា ប្រធានាធិបតីអាមេរិក Donald Trump បានអំពាវនាវឱ្យមានបទឈប់បាញ់ និងបានព្រមានថា អាមេរិកអាចវាយប្រហារលើហេដ្ឋារចនាសម្ព័ន្ធថាមពលរបស់អ៊ីរ៉ង់ ប្រសិនបើមិនមានកិច្ចព្រមព្រៀងសន្តិភាព។

ទោះបីមានការខិតខំប្រឹងប្រែងការទូតតាមរយៈប្រទេសមធ្យមដូចជា ប៉ាគីស្ថាន និងតួកគីក៏ដោយ ការចរចារវាងភាគីទាំងពីរនៅតែមិនទាន់មានវឌ្ឍនភាពច្បាស់លាស់នៅឡើយ។

ប្រភព: Reuters, AP, និងប្រព័ន្ធផ្សព្វផ្សាយអន្តរជាតិ