ថៃ និងវៀតណាមនាំចេញទុរេនទៅទីផ្សារចិន ក្រោមស្លាក Musang King របស់ ម៉ាឡេស៊ី

ថៃ និងវៀតណាមនាំចេញទុរេនទៅទីផ្សារចិន ក្រោមស្លាក Musang King របស់ ម៉ាឡេស៊ី

គូឡាឡាំពួរ៖ រដ្ឋាភិបាលម៉ាឡេស៊ីកំពុងបង្កើនកិច្ចខិតខំប្រឹងប្រែង ដើម្បីការពារម៉ាកផ្លែទុរេន Musang King និងរក្សាសិទ្ធិជាម្ចាស់លើពូជទុរេននេះ នៅក្នុងទីផ្សារនាំចេញ។

រដ្ឋមន្ត្រីក្រសួងកសិកម្ម និងសន្តិសុខស្បៀង លោក Mohamad Sabu បាននិយាយថា រដ្ឋាភិបាលបានដឹងពីការចោទថា ផ្លែទុរេនពីប្រទេសថៃ និងវៀតណាម កំពុងត្រូវបាននាំចេញទៅកាន់ប្រទេសចិន ក្រោមឈ្មោះ Musang King។

លោកបន្ថែមថា ប្រទេសម៉ាឡេស៊ីបានទទួលការចុះបញ្ជីសញ្ញាសម្គាល់ភូមិសាស្ត្រ (Geographical Indication) សម្រាប់ Musang King រួចហើយ ដែលផ្តល់ឱ្យប្រទេសនេះនូវសិទ្ធិផ្តាច់មុខលើការប្រើប្រាស់ឈ្មោះនេះ។

លោក Mohamad បានប្រាប់រដ្ឋសភាក្នុងពេលមានសំនួរចម្លើយថា៖ «យើងបានចុះបញ្ជីសញ្ញាសម្គាល់ភូមិសាស្ត្រសម្រាប់ Musang King ដែលជាកម្មសិទ្ធិរបស់ប្រទេសម៉ាឡេស៊ី។ ប្រទេសផ្សេងៗ មិនអាចដាក់ឈ្មោះផ្លែទុរេនរបស់ពួកគេថា Musang King បានទេ ទោះបីជារូបរាងស្រដៀងគ្នាក៏ដោយ»។

លោកបានឆ្លើយតបទៅនឹងសំនួរថា តើរដ្ឋាភិបាលបានដឹងអំពីករណីទុរេនពីប្រទេសថៃ និងវៀតណាម ដែលត្រូវបាននាំចេញទៅប្រទេសចិន ប៉ុន្តែដាក់ស្លាកថា Musang King ឬទេ និងមានវិធានការអ្វីខ្លះ ដើម្បីការពារមុខមាត់ និងកេរ្តិ៍ឈ្មោះរបស់ម៉ាឡេស៊ី? ។

យោងតាមលោក Mohamad ពូជ Musang King ដែលដាំដុះនៅប្រទេសម៉ាឡេស៊ី មានលក្ខណៈខុសប្លែកពីពូជស្រដៀងគ្នា ដែលដាំដុះនៅប្រទេសផ្សេងៗ។

លោកបានមានប្រសាសន៍ថា៖
«យើងដឹងថា រសជាតិ Musang King នៅម៉ាឡេស៊ី មិនដូចគ្នានឹងកន្លែងផ្សេងទេ» ហើយលោកបានបន្ថែមថា លោកបានសាកល្បងទុរេនដែលមានស្លាក Musang King ដោយផ្ទាល់ ក្នុងអំឡុងពេលទស្សនកិច្ចនៅប្រទេសចិន។

លោកបានបន្តថា៖«នៅពេលណាដែលខ្ញុំទៅប្រទេសចិន មិនថាជាផ្លូវការ ឬក្រៅផ្លូវការ ខ្ញុំតែងតែពិនិត្យមើលផ្លែទុរេនដែលលក់នៅទីនោះ។ នៅពេលដែលពួកគេដាក់ឈ្មោះថា Musang King ខ្ញុំសាកល្បងវា ហើយវាមិនដូចរបស់ម៉ាឡេស៊ីទេ»។

ក្រសួងកំពុងធ្វើការជាមួយអាជ្ញាធរចិន រួមទាំងអគ្គរដ្ឋបាលគយនៃប្រទេសចិន ដើម្បីធានាការទទួលស្គាល់ និងការការពារការនាំចេញ Musang King ពិតប្រាកដពីម៉ាឡេស៊ី។

អាជ្ញាធរទីផ្សារកសិកម្មសហព័ន្ធ ក៏កំពុងពង្រឹងការកសាងកេរ្តិ៍ឈ្មោះ តាមរយៈស្លាកសញ្ញាវិញ្ញាបនបត្រ MyBest ផងដែរ។

លោកបានមានប្រសាសន៍ថា៖
«តាមរយៈអាជ្ញាធរទីផ្សារកសិកម្មសហព័ន្ធ យើងដាក់ស្លាកផ្លែទុរេនក្រោម MyBest ដូច្នេះ Musang King ពិតប្រាកដរបស់ម៉ាឡេស៊ី ដែលត្រូវបានអនុម័តដោយអគ្គរដ្ឋបាលគយចិន អាចត្រូវបានទទួលស្គាល់យ៉ាងច្បាស់»។

លោក Mohamad បានបន្ថែមថា ភ្នាក់ងារអនុវត្តច្បាប់ រួមទាំងសេវាចត្តាឡីស័ក និងអធិការកិច្ចរបស់ម៉ាឡេស៊ី នឹងបង្កើនកិច្ចសហប្រតិបត្តិការផ្នែកបច្ចេកទេស និងការសន្ទនាជាមួយអាជ្ញាធរចិន ដើម្បីដោះស្រាយការព្រួយបារម្ភអំពីការដាក់ស្លាកខុស។
លោកបានមានប្រសាសន៍ថា៖«យើងនឹងធ្វើការពិភាក្សាយ៉ាងតឹងរ៉ឹងជាមួយអគ្គរដ្ឋបាលគយចិន និងជូនដំណឹងទៅភាគីចិនតាមរយៈបណ្តាញផ្សេងៗ ដើម្បីឱ្យពួកគេដឹងថា Musang King របស់ម៉ាឡេស៊ី ត្រូវបានអនុម័ត និងមានស្លាក MyBest»។

លោកបានបញ្ជាក់ថា ការការពារម៉ាក Musang King នៅតែជាអាទិភាព ព្រោះការនាំចេញទុរេនទៅកាន់ប្រទេសចិន បានក្លាយជាវិស័យមានតម្លៃខ្ពស់ និងជាប្រភពចំណូលសំខាន់សម្រាប់កសិករម៉ាឡេស៊ី។

លោកបាននិយាយថា៖«យើងត្រូវតែការពារវា ព្រោះការនាំចេញទៅប្រទេសចិនមានតម្លៃខ្ពស់ ហើយបានក្លាយជាមុខរបរថ្មីសម្រាប់កសិករទុរេនរបស់យើង»។«ដូច្នេះ យើងនឹងបន្តការពារ Musang King ជាម៉ាករបស់ប្រទេសម៉ាឡេស៊ី»៕
https://www.malaymail.com/news/malaysia/2026/02/25/malaysia-fights-to-protect-musang-king-pride-as-impostor-durians-surface-in-china/210381

https://www.freshplaza.com/asia/article/9814564/malaysia-strengthens-protection-of-musang-king-exports-to-china/