អត្តពលិកកម្ពុជា ៦រូប ឡើងដណ្តើមមេដាយមាសកីឡាឃីកបុកស៊ីងអាស៊ី ដែលកម្ពុជាធ្វើជាម្ចាស់ផ្ទះ

អត្តពលិកកម្ពុជា ៦រូប ឡើងដណ្តើមមេដាយមាសកីឡាឃីកបុកស៊ីងអាស៊ី ដែលកម្ពុជាធ្វើជាម្ចាស់ផ្ទះ

បន្ទាប់ពីឆ្លងកាត់ការប្រកួតរយៈពេល២ថ្ងៃ ពេលនេះ អត្តពលិកកម្ពុជាជាច្រើននាក់បានឈានដល់វគ្គផ្តាច់ព្រ័ត្រ ក្នុងការប្រកួតកីឡាឃីកបុកស៊ីងជើងឯកអាស៊ី ឆ្នាំ២០២៤ ដែលប្រទេសកម្ពុជាធ្វើជាម្ចាស់ផ្ទះ។

គិតត្រឹមព្រឹកថ្ងៃទី១០ ខែតុលា ឆ្នាំ២០២៤ កម្ពុជាមានកីឡាករ កីឡាការិនីចំនួន៦រូបហើយ បានឈានដល់វគ្គផ្តាច់ព្រ័ត្រដើម្បីដណ្តើមមេដាយមាស ក្នុងនោះមានដូចជា កីឡាករ ព្រុំ សំណាង, កីឡាការិនី ឆា ចាន់ដេង, កីឡាការិនី ទូច ចាត់វត្តី, កីឡាករ ឈុង វិសាល, កីឡាការិនី ទួន ស្រីភីន និងកីឡាការិនី នៅ ស្រីពៅ។

ជាមួយគ្នានេះ ក៏មានកីឡាករ និងកីឡាការិនីមួយចំនួនទៀតបានឈានដល់វគ្គពាក់កណ្តាលផ្តាច់ព្រ័ត្រ ដែលត្រូវបន្តការប្រកួតទៀត ដែលមានដូចជា កីឡាការិនី លី ស៊ុង, កីឡាករ ទេព យិនយ៉ាន, កីឡាករ វ៉ុន គីមចេង, កីឡាករ សាំង សាមិត្ត, កីឡាករ រី បូរាជ, កីឡាការិនី អេ យ៉ានុត, កីឡាករ ខាំ ក្លានាង, កីឡាករ សៃណី សៃណេត, កីឡាករ សុខ រិទ្ធ, កីឡាករ ឃួន ឡាំកូស៊ីន, កីឡាករ ហ៊ុន ច័ន្ទរាជ, កីឡាករ សែន រ៉ាឌី, កីឡាករ ទូច ដេវីដ និងកីឡាករ មឿន សុខហ៊ុច។

ខាងក្រោមនេះជាកាលវិភាគការប្រកួតក្នុងវគ្គផ្តាច់ព្រ័ត្រ៖
• កីឡាករ ព្រុំ សំណាង vs អ៊ូបេគីស្ថាន/អ៉ីរ៉ាក់ វគ្គផ្តាច់ព្រ័ត្រ វិញ្ញាសា K1-៨៦គីឡូក្រាម
• កីឡាការិនី ឆា ចាន់ដេង vs Khati Solomi (ឥណ្ឌា) វគ្គផ្តាច់ព្រ័ត្រ វិញ្ញាសា K1-៤៨គីឡូក្រាម
• កីឡាការិនី ទូច ចាន់វត្តី vs Pieters Diandra Ariesta (ឥណ្ឌូណេស៊ី)/ Bagceri Charouk Atefeh (អ៉ីរ៉ង់) វគ្គផ្តាច់ព្រ័ត្រ វិញ្ញាសា KL -៥៥គីឡូក្រាម។
• កីឡាករ ឈុង វិសាល vs Nguyen Si Thang (វៀតណាម) / Bairmuratov Dinmukhamed (កាហ្សាស្ថាន) វគ្គផ្តាច់ព្រ័ត្រ វិញ្ញាសា FC -៥១គីឡូក្រាម
• កីឡាការិនី ទួន ស្រីភីន vs Alkharif Seham (គុយវែត) / Myllimengap Daniella Wanda (ឥណ្ឌា) វគ្គផ្តាច់ព្រ័ត្រ វិញ្ញាសា K1-៥៦គីឡូក្រាម
• កីឡាការិនី នៅ ស្រីពៅ vs Neelakandan Neena (ឥណ្ឌា) វគ្គផ្តាច់ព្រ័ត្រ វិញ្ញាសា LC -៥៥គីឡូក្រាម។

គួរបញ្ជាក់ថា ព្រឹត្តិការណ៍ប្រកួតកីឡាឃីកបុកស៊ីងជើងឯកអាស៊ី ឆ្នាំ២០២៤ មានប្រភេទលើសង្វៀន (Ring Styles)គឺ Full Contact, Low Kick និង K1-Styles ខណៈសង្វៀនលើកក្តារ (Tatami Stayles) មាន Points Fighting, Light Contact, Kick Light និងប្រភេទសម្តែង Musical Forms។ សរុបទាំងអស់មាន១១០វិញ្ញាសា (១១០មេដាយមាស ១១០មេដាយប្រាក់ និង២២០មេដាយសំរិទ្ធ)៕