រដ្ឋមន្ត្រីអប់រំ ៖ ដើម្បីជំរុញកំណែទម្រង់វិស័យអប់រំឱ្យកាន់តែល្អប្រសើរទាមទារចាំបាច់ត្រូវចាប់ផ្តើមពីលោកគ្រូ អ្នកគ្រូ
រដ្ឋមន្ត្រីអប់រំ ៖ ដើម្បីជំរុញកំណែទម្រង់វិស័យអប់រំឱ្យកាន់តែល្អប្រសើរទាមទារចាំបាច់ត្រូវចាប់ផ្តើមពីលោកគ្រូ អ្នកគ្រូ
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្តី្រ រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ដើម្បីជំរុញកំណែទម្រង់វិស័យអប់រំឱ្យកាន់តែល្អប្រសើរទាមទារចាំបាច់ត្រូវចាប់ផ្តើមពីលោកគ្រូ អ្នកគ្រូ ដែលមានគុណវុឌ្ឍិមានសិល្បៈក្នុងការបង្រៀនជាមួយគ្នានេះក្រសួងនៅតែបន្តកិច្ចខិតខំប្រឹងប្រែងបង្កើត និងចងក្រងឯកសារបង្រៀនថ្មីៗ និងកញ្ចប់អំណានផ្តល់ជូនដល់សាលាគរុកោសល្យជាបន្តបន្ទាប់ដើម្បីជាទុនដល់ការបង្រៀន។
ឯកឧត្តមបណ្ឌិតសភាចារ្យ ហង់ជួន ណារ៉ុនបានលើកឡើងបែបនេះ ក្នុងពេលឯកឧត្តមដឹកនាំកិច្ចប្រជុំស្តីពី “វឌ្ឍនភាពនៃការអនុវត្តកំណែទម្រង់សាលាគរុកោសល្យ” ដោយមានចូលរួមពីសំណាក់ ឯកឧត្តមលោកជំទាវមន្ត្រី ពាក់ព័ន្ធក្រោមឱវាទក្រសួង និងលោកគ្រូ អ្នកគ្រូមកពីគ្រឹះស្ថានអប់រំគ្រូបង្រៀនគ្រប់ខេត្ត ក្រុង សរុបចំនួន១៤៨នាក់ នៅវិទ្យាស្ថានគរុកោសល្យរាជធានីភ្នំពេញនៅថ្ងៃ០១ ខែកុម្ភៈ ឆ្នាំ ២០២៤ ។
គោលបំណងនៃកិច្ចប្រជុំនេះគឺ ដើម្បីពិនិត្យវឌ្ឍនភាពនៃការអនុវត្តកំណែទម្រង់សាលាគរុកោសល្យសិក្សាពីបញ្ហាប្រឈមនានាដើម្បីស្វែងរកដំណោះស្រាយ និងណែនាំគ្រឹះស្ថានអប់រំគ្រូបង្រៀនទាំងអស់ ដើម្បីត្រៀមខ្លួនអនុវត្តក្នុងការកែទម្រង់គ្រូបង្រៀនជំរុញឱ្យកាន់តែមានប្រសិទ្ធភាព និងប្រសិទ្ធផលខ្ពស់ឈានទៅសម្រេចគោលដៅយុទ្ធសាស្ត្រកំណែទម្រង់វិស័យអប់រំរបស់រដ្ឋាភិបាលនីតិកាលទី៧ នៃរដ្ឋសភាដែលផ្តោតលើការអភិវឌ្ឍមូលធនមូលមនុស្សជាអាទិភាព។
ទន្ទឹមគ្នានេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្តី្រ បានផ្ដល់អនុសាសន៍ឱ្យលោកគ្រូ អ្នកគ្រូទាំងអស់សិក្សាពីឫសគល់នៃបញ្ហាប្រឈមនានា បន្តពង្រឹងពង្រីកចំណេះដឹងសមត្ថភាពភាសាបរទេស និងបច្ចេកវិទ្យា និងបង្កើតវិធីសាស្ត្របង្រៀនថ្មីៗ ឆ្លើយតបនឹងវិធានគន្លឹះ៤ ដាក់ចេញដោយសម្តេចមហាបវរធិបតី នាយករដ្ឋមន្ត្រី ក្នុងគោលដៅដើម្បីឈានទៅពង្រឹងគុណភាពអប់រំលើកកម្ពស់លទ្ធផលសិក្សាសិស្សដូចជា៖ (ទី១).ពង្រឹងអភិបាលកិច្ចសាលារៀន (ទី២).ពិនិត្យកែសម្រួលនិងរៀបចំកម្មវិធីសិក្សា និងសកម្មភាពក្រៅម៉ោងសិក្សា ឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស (ទី៣).សុខភាពសិក្សាតាមរយៈកម្មវិធីអាហារូបត្ថម្ភ និងការត្រួតពិនិត្យគុណភាពចំណីអាហារនៅតាមសាលារៀន និង(ទី៤).ជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ក្នុងការអប់រំ។
គួរបញ្ជាក់ដែរថា ដើម្បីអនុវត្តគោលនយោបាយផែនការយុទ្ធសាស្ត្រគាំទ្រវិស័យអប់រំ និងក្របខណ្ឌ កម្មវិធីអប់រំរបស់ក្រសួងអប់រំ យុវជន និងកីឡា ឱ្យមានប្រសិទ្ធភាពក្រុមការងារកំណែទម្រង់គ្រូបង្រៀននៃលេខាធិការដ្ឋានអភិវឌ្ឍន៍ធនធានគ្រូបង្រៀន ត្រូវបានបង្កើតឡើងនៅឆ្នាំ២០២២ ដោយមានក្រុមការងារចំនួន ៦ក្រុម៖ (១)ក្រុមការងារកម្មវិធីសិក្សា និងវិធីសាស្ត្របង្រៀន (២)ក្រុមការងារការអភិវឌ្ឍសមត្ថភាព និងការពង្រឹងគុណភាពគ្រូឧទ្ទេស (៣)ក្រុមការងារកែលម្អធនធានសិក្សា និងហេដ្ឋារចនាសម្ព័ន្ធ (៤)ក្រុមការងារភាពជាអ្នកដឹកនាំ (៥)ក្រុមការងារផ្សារភ្ជាប់គ្រឹះស្ថានបណ្តុះបណ្តាលគ្រូ និងសាលាអនុវត្តន៍ (៦)ក្រុមការងារធានាគុណភាពគ្រឹះស្ថានបណ្តុះបណ្តាលគ្រូ។ ក្រុមការងារកំណែទម្រង់គ្រូបង្រៀននេះ បានប្រជុំរៀបចំផែនការសកម្មភាពដើម្បីអនុវត្តទៅតាមតួនាទី និងភារកិច្ចរៀងៗខ្លួន និងទទួលបានលទ្ធផល ឆ្លើយតបទៅតាមគោលនយោបាយរបស់ក្រសួងអប់រំ យុវជន និងកីឡា៕
