មោទនភាពណាស់! កីឡាការិនី ស្រួង ភាវី ទទួលពានរង្វាន់ Asia Special Award 2023 នៅកូរ៉េខាងត្បូង
មោទនភាពណាស់! កីឡាការិនី ស្រួង ភាវី ទទួលពានរង្វាន់ Asia Special Award 2023 នៅកូរ៉េខាងត្បូង
ម្ចាស់មេដាយមាសស៊ីហ្គេម២០២៣ កីឡាការិនី ស្រួង ភាវី បន្តទទួលបានពានរង្វាន់ Asia Special Award 2023 ពីកម្មវិធី Asia Model Festival ដែលរៀបចំឡើងនៅប្រទេសកូរ៉េខាងត្បូងកាលពីដើមសប្ដាហ៍នេះ។
ខាងក្រោមនេះជាការបញ្ជាក់របស់កីឡាការិនី ស្រួង ភាវី ៖ សូមជម្រាបពុកម៉ែបងប្អូន នាងខ្ញុំត្រូវបានជ្រេីសរេីសឱ្យទទួលពានរង្វាន់ Asia Special Award 2023 ដែលរៀបចំដោយAsia Model Festival នៅថ្ងៃទី០៥ ខែវិច្ឆិកា ឆ្នាំ២០២៣ ពីកម្មវិធី Asia Model Festival នៅប្រទេសកូរ៉េខាងត្បូង។
កីឡាការិនីលេខ៣ លើពិភពលោក និងលេខ ១ នៅកូរ៉េខាងត្បូង នៃកីឡាស្នូកឃ័រ រូបនេះបានបន្ថែមថា ៖ ពុកម៉ែបងប្អូនជាទីគោរព សម្រាប់រូបនាងខ្ញុំផ្ទាល់ រាល់ពេលទទួលបានពានរង្វាន់នៅឆាកអន្តរជាតិកន្លងមក នៅពេលគេហៅឈ្មោះ ស្រួង ភាវី ឡេីងទៅលេីវេទិកាដេីម្បីទទួលពានរង្វាន់ អារម្មណ៍នាងខ្ញុំគ្រាន់តែឮ ត្រឹមតែដឹងថាគេបានហៅខ្ញុំហើយ។ ប៉ុន្ដែនៅពេលឮគេហៅថា Cambodia Cambodia ឡេីងទៅលេីវេទិកា អារម្មណ៍របស់ខ្ញុំពិតជារំភើបប្រកបដោយសេចក្ដីសោមនស្សរីករាយ និងមោទនភាពជាពន់ពេក ។ ព្រោះថា ស្រួង ភាវី មកពីប្រទេសកម្ពុជាសូមអញ្ជើញឡេីងមកលេីវេទិកា គឺក្នុងចិត្តខ្ញុំគិតថាគេកំពុងតែហៅប្រជាជនកម្ពុជាទាំងអស់ឡេីងទៅលេីវេទិកាដេីម្បីទទួលនូវកិត្តិយសដ៏ថ្លៃថ្លាឧត្តុងឧត្តមនៅឆាកអន្តរជាតិ។
ស្ត្រីជើងខ្លាំងរូបនេះបន្តថា ពុកម៉ែបងប្អូន កូនស្រីកម្ពុជាម្នាក់នេះ បានឧទ្ទិសរួចហើយរាល់សមិទ្ធផលទាំងប៉ុន្មានដែលនាងខ្ញុំសម្រេចបាន គឺខ្ញុំបានដាក់ជារបស់រួមសម្រាប់ប្រជាជនខ្មែរទាំងអស់ និងប្រទេសជាតិទាំងមូល។ ខ្ញុំសង្ឃឹមថារាល់ភាពជោគជ័យដែលកូនខ្មែរទទូលបាន សូមគាំទ្រ ស្រលាញ់ ផ្ដល់តម្លៃ ផ្ដល់កម្លាំងចិត្ត និងលេីកស្ទួយដល់ពួកគាត់ ដែលបាន និងកំពុងខិតខំប្រឹងប្រែងខ្លាំងណាស់ទម្រាំទទួលបានជោគជ័យដ៏ត្រចះត្រចង់នៅលេីឆាកអន្តរជាតិនានា។
ជាចុងបញ្ចប់ នាងខ្ញុំសូមឱ្យប្រជាជនខ្មែរទាំងអស់ចេះស្រឡាញ់គ្នា សាមគ្គីគ្នា មានមេត្តា ករុណាដល់គ្នានិងគ្នា ក្នុងនាមជាឈាមជ័រតែមួយ។ សូមគោរពជូនពរពុកម៉ែបងប្អូនជួបប្រទះតែសេចក្ដីសុខគ្រប់ប្រការ។ សូមអរគុណ ៕
